કેનેડાના વેનકુવરમાં બ્રિટિશ કોલંબિયા સુપ્રીમ કોર્ટે એક મહત્વપૂર્ણ ચુકાદો આપતા પારિવારિક મિલકત કંપનીઓ સામે પુત્ર દ્વારા દાખલ કરવામાં આવેલ કાયદાકીય પડકારને ફગાવી દીધો છે. અરજદાર પુત્ર એવું માનતો હતો કે પારિવારિક કંપનીઓમાં શેર હોવાને કારણે તેને કંપનીની ચોક્કસ મિલકતો પર સીધી માલિકીનો અધિકાર મળે છે. તેણે તેના પિતાના એસ્ટેટ પ્લાનિંગ અને વસિયત પર સવાલ ઉઠાવતા દાવો કર્યો હતો કે તેમાં પુત્રીને વધુ પ્રાધાન્ય આપવામાં આવ્યું છે અને આ નિર્ણય કંપની દ્વારા તેના પ્રત્યે અન્યાયી વર્તનને દર્શાવે છે. સુનાવણી દરમિયાન તેણે કંપનીઓ અને તેના પરિવારજનો સામે 'દમનકારી વર્તન' કર્યાનો આરોપ મૂક્યો હતો, જેથી કોર્ટે આ મામલે હસ્તક્ષેપ કરવો જોઈએ.
કેસની સુનાવણી કરતા મેડમ જસ્ટિસ જે.જી. હેરિસે કંપન કાયદાના મૂળભૂત નિયમને સ્પષ્ટ કરતા જણાવ્યું કે શેરધારકો માત્ર કંપનીના શેર ધરાવે છે, કંપનીની કાનૂની માલિકીની વ્યક્તિગત મિલકતોના સીધા માલિક નથી બનતા. જજ હેરિસે સ્પષ્ટ કર્યું કે પુત્રની આ ધારણા સંપૂર્ણપણે કાનૂની દ્રષ્ટિએ ભ્રામક છે કે શેરધારક હોવાના નાતે તે મિલકતોનો સીધો માલિક બની જાય છે. કોર્ટે જણાવ્યું કે પિતાની મિલકતની વહેંચણી કે વારસાના આયોજન સાથેના મતભેદો એ કઠોર કોર્પોરેટ દમનનો મામલો નથી બનતા. પિતાએ તેમની સંપત્તિ કઈ રીતે વહેંચવી તે અલગ પારિવારિક બાબત છે, જેને કોર્પોરેટ કાયદા હેઠળ પડકારી શકાય નહીં અને પુત્ર આ બાબતમાં કંપનીનું શોષણ સાબિત કરવામાં નિષ્ફળ ગયો છે.
જો કે, કોર્ટે માત્ર પિતાની મિલકતના વિવાદમાં જ નહીં પરંતુ દસ્તાવેજો મેળવવાના મુદ્દે મહત્વનો આદેશ આપ્યો હતો. પુત્રએ કંપનીના સંચાલનને સમજવા અને પોતાના શેરોનું મૂલ્ય આંકવા માટે પારિવારિક વ્યવસાયોના નાણાકીય અને કોર્પોરેટ રેકોર્ડ્સની માંગણી કરી હતી, જેનો કંપનીએ વિરોધ કર્યો હતો. જસ્ટિસ હેરિસે કંપનીના આ વિરોધને ફગાવી દીધો અને જણાવ્યું કે કાયદાકીય દાવા નિષ્ફળ જવા છતાં શેરધારકોને કંપનીના રેકોર્ડ તપાસવાનો મૂળભૂત અધિકાર રહેલો છે. આથી, કોર્ટે કંપનીઓને આદેશ આપ્યો કે તેઓ સંબંધિત નાણાકીય અને કોર્પોરેટ માહિતી પુત્રને ઉપલબ્ધ કરાવે, જે વારસાના વિવાદો અને શેરધારકના કાનૂની હકો વચ્ચે સ્પષ્ટ રેખા દોરે છે.
