సుરેન્દ્રનગર જિલ્લાના થાનગઢ વિસ્તારમાં લાંબા સમયથી ચાલી રહેલી ગેરકાયદે ખનીજ અને કોલસા ચોરીની પ્રવૃત્તિઓ સામે સ્થાનિક પોલીસે લાલ આંખ કરી છે. રાજકોટ વિભાગના પોલીસ મહાનિરીક્ષક (આઈ.જી.) નિર્લિપ્ત રાય અને જિલ્લા પોલીસ અધિક્ષક પ્રેમસુખ ડેલુના માર્ગદર્શન હેઠળ જિલ્લામાં ગેરકાયદે ખનન વિરુદ્ધ વિશેષ અભિયાન શરૂ કરવામાં આવ્યું છે. આ અભિયાનના ભાગરૂપે ચોટીલા ડિવિઝનના નાયબ પોલીસ અધિક્ષક એસ.એસ. ભદોરિયાના સીધા માર્ગદર્શન હેઠળ થાનગઢ પોલીસ સ્ટેશનની ટીમને મળેલી ચોક્કસ બાતમીના આધારે આ સઘન કાર્યવાહી હાથ ધરવામાં આવી હતી.
પોલીસે બાતમીવાળા સ્થળો પર અચાનક દરોડા પાડતા ખનિજ માફિયાઓમાં ભારે હડકંપ મચી ગયો હતો. તપાસ દરમિયાન વેલાળા ગામની સીમમાંથી ૧ ટ્રેક્ટર, ૬ લોખંડના પાઈપ અને ૧૦૦ મેટ્રિક ટન ગેરકાયદે કાર્બોસેલ કોલસો મળી આવ્યો હતો, જેની કુલ કિંમત ૮.૧૦ લાખ રૂપિયા આંકવામાં આવી છે. આ ઉપરાંત, જામવાળી ગામની સીમમાં પણ સઘન તપાસ હાથ ધરવામાં આવતા ત્યાંથી ૧૭ લોખંડના પાઈપ, ૭ ડિઝલ ચરખી અને ૪૦૦ મેટ્રિક ટન કોલસો મળી આવ્યો હતો, જેની અંદાજિત કિંમત ૧૭.૬૫ લાખ રૂપિયા થાય છે. આમ, બંને સ્થળો મળીને પોલીસે કુલ ૫૦૦ મેટ્રિક ટન ગેરકાયદે કોલસો અને અન્ય સાધનો સહિત કુલ ૨૫.૭૫ લાખ રૂપિયાનો મુદ્દામાલ કબ્જે કર્યો છે.
આ સફળ દરોડા બાદ પોલીસે જપ્ત કરાયેલ તમામ મુદ્દામાલ અને મશીનરી સુરક્ષિત રીતે કબજે કરી કાયદેસરની પ્રક્રિયા શરૂ કરી દીધી છે. ગેરકાયદે ખનનની આ ગંભીર પ્રવૃત્તિ અંગે સુરેન્દ્રનગર જિલ્લાના ખાણ-ખનિજ વિભાગને પણ સત્તાવાર રીતે જાણ કરવામાં આવી છે. પોલીસ સૂત્રોના જણાવ્યા અનુસાર, આ ખનન પ્રવૃત્તિ પાછળ સંડોવાયેલા મુખ્ય સૂત્રધારો અને અન્ય શખ્સોની ઓળખ મેળવીને તેમની સામે પણ કડકમાં કડક કાનૂની પગલાં લેવામાં આવશે, જેથી ભવિષ્યમાં આ વિસ્તારમાં કોલસાની ચોરી ડામી શકાય.
