તામિલનાડુના થેની જિલ્લામાં આવેલી થેક્કમપટ્ટી સબ-જેલમાંથી એક ચોંકાવનારી ઘટના સામે આવી છે, જ્યાં સોમવારે મોડી રાત્રે કેટલાક કેદીઓએ ભેગા મળીને ભાગી છૂટવાનું મોટું પ્લાનિંગ રચ્યું હતું. આ કેદીઓએ જેલના સેલમાં મિર્ગીના હુમલાનું નાટક કર્યું હતું જેથી સ્ટાફના લોકો તેમને મદદ કરવા માટે દરવાજો ખોલે. જેવું જેલનું સ્ટાફ નજીક આવ્યું કે તરત જ આ ચાલાક કેદીઓએ તેમના પર હુમલો કરી દીધો અને અંધારાનો લાભ લઈને જેલમાંથી ફરાર થઈ ગયા હતા. આ ઘટના બાદ પોલીસ તંત્રમાં ભારે દોડધામ મચી ગઈ હતી અને તરત જ આસપાસના વિસ્તારમાં નાકાબંધી કરી દેવામાં આવી હતી.
આ ભાગેડુઓને પકડવા માટે પ્રશાસને હાઇ-ટેક ટેકનોલોજીનો સહારો લીધો હતો અને જંગલ તથા ડુંગરાળ વિસ્તારમાં શોધખોળ માટે 3 સ્પેશિયલ ડ્રોન કામે લગાડવામાં આવ્યા હતા. ડ્રોન ફૂટેજની મદદથી પોલીસને કેદીઓ જંગલમાં કઈ જગ્યાએ છુપાયા છે તેની ચોક્કસ માહિતી મળી ગઈ હતી, જેના આધારે 5 સ્પેશિયલ ટાસ્ક ફોર્સ ટીમ સહિત કુલ 17 વિશેષ ટીમોએ જંગલોમાં સર્ચ ઓપરેશન તીવ્ર બનાવ્યું હતું. આ ઉપરાંત પડોશી જિલ્લાઓ અને કેરળ પોલીસને પણ એલર્ટ કરી દેવામાં આવી હતી તેમજ રેલવે સ્ટેશન, એરપોર્ટ અને બસ સ્ટેન્ડ પર પણ સઘન ચેકિંગ હાથ ધરવામાં આવ્યું હતું. આ વ્યાપક ઓપરેશનના અંતે ભાગી છૂટેલા 17 કેદીઓમાંથી 13 કેદીઓની ધરપકડ કરવામાં સફળતા મળી છે, જેમાં કરુપ્પાસામી ઉર્ફે મધન, ધરૂણકુમાર, રાજકુમાર, પાંડિસેલવમ, સાબરીનાથન, નિશાંત, મુથુ ઇલંગોવન, કાર્તિક રાજા, પ્રશાંત ઉર્ફે લિંગા પ્રશાંત, રાજા સિંકાન્થાર, સિલંબારસન, સોઆલિમુગિલેશ્વરન અને પ્રવીણકુમાર જેવા નામ સામે સામે આવ્યા છે.
આ ગંભીર સુરક્ષા ચૂકને કારણે પ્રિઝન ડિપાર્ટમેન્ટે સખત કાર્યવાહી કરીને આ મામલે 9 અધિકારીઓને સસ્પેન્ડ કરી દીધા છે, જ્યારે બાકીના ફરાર કેદીઓની શોધખોળ હજુ પણ ચાલુ છે. પ્રિઝન ડીજીપી સંદીપ રાય રાઠોડે જેલની મુલાકાત લઈને સ્થિતિનો તાગ મેળવ્યો હતો અને પોલીસ તથા અન્ય ટીમોના સંયુક્ત પ્રયાસોની પ્રશંસા કરી હતી. બીજી તરફ, આ જેલબ્રેકની ઘટનાને લઈને રાજ્યમાં રાજકારણ પણ ગરમાયું છે અને વિપક્ષી નેતાઓએ સરકારની લો એન્ડ ઓર્ડર તથા જેલ સુરક્ષા સામે ગંભીર સવાલો ઉઠાવ્યા છે. બાકી રહેલા કેદીઓને પકડવા માટે હજુ પણ પોલીસનું સઘન ચેકિંગ અને સર્ચ ઓપરેશન ચાલુ છે.
