અમદાવાદ શહેરમાં ગુનેગારોના વધી રહેલા हौસલાનો એક ચોંકાવનારો કિસ્સો સામે આવ્યો છે, જ્યાં નોકરી પતાવીને ઘરે જઈ રહેલા ત્રણ મિત્રોનું ચા પીતી વખતે બળજબરીપૂર્વક અપહરણ કરવામાં આવ્યું હતું. દાણીલીમડા વિસ્તારમાં રહેતો અને હાથીજણ ખાતે ફટાકડાના સ્ટોલમાં નોકરી કરતો યશ પરમાર નામનો યુવક ગત 25 ઓક્ટોબરની રાત્રે પોતાના મિત્રો નૈતિક અને તુષાર ઠાકોર સાથે બાઇક પર પરત ફરી રહ્યો હતો. આ દરમિયાન શાહઆલમ ટોલનાકા નજીક ચાની કીટલી પર રોકાયેલા આ યુવકોને નિશાન બનાવીને કેટલાક શખસો તેમને કારમાં અપહરણ કરીને લઈ ગયા હતા, જેણે સમગ્ર વિસ્તારમાં ચકચાર મચાવી દીધી છે.
પોલીસ સૂત્રોના જણાવ્યા અનુસાર, ભીલવાસ અને ઇસનપુર વિસ્તારના તરુણ, વિવેક અને ચીંટુ નામના શખસો કાર લઈને ત્યાં ધસી આવ્યા હતા અને ત્રણેય મિત્રોને બળજબરીથી કારમાં બેસાડીને ગોમતીપુર થઈ નારોલ બ્રિજ તરફ લઈ ગયા હતા. આશરે 20 કિલોમીટર સુધી કારમાં ફેરવ્યા બાદ આરોપીઓએ યુવકો પાસે પૈસાની માગણી કરી હતી અને પૂરતા પૈસા ન હોવાથી લાકડાના દંડાથી બેફામ માર માર્યો હતો. આરોપી તરુણે છરી બતાવીને જાનથી મારી નાખવાની ધમકી આપી હતી અને યશના ખિસ્સામાંથી 5,500 રૂપિયા લૂંટી લીધા હતા. આટલેથી સંતોષ ન થતાં આરોપીઓએ યુવકોના ઘરેથી વધુ 50,000 રૂપિયા મંગાવવા માટે ભારે દબાણ કર્યું હતું અને કાર યશની ચાલીના નાકે લાવ્યા હતા.
પૈસા કઢાવવાના હેતુથી કાર રોકાતા જ યશ અને નૈતિકે ભારે સમયસૂચકતા વાપરીને તકનો લાભ લઈને કારમાંથી છલાંગ લગાવી દીધી હતી અને તેમની પાછળ તુષાર પણ આરોપીઓની નજર ચૂકવીને નાસી છૂટવામાં સફળ રહ્યો હતો. યુવકો હાથમાંથી નીકળી જતા ગભરાયેલા આરોપીઓ પોતાની કાર લઈને ત્યાંથી ફરાર થઈ ગયા હતા. આ ગંભીર ઘટના બાદ ભોગ બનનાર યશે હિંમત દાખવીને કાગડાપીઠ પોલીસ સ્ટેશનમાં પહોંચીને ત્રણેય આરોપીઓ વિરુદ્ધ સત્તાવાર ફરિયાદ નોંધાવી છે, જેના આધારે પોલીસે આરોપીઓને ઝડપી પાડવા માટે ચક્રો ગતિમાન કર્યા છે.
