રાજકોટના હીરાસર ખાતે આવેલા ઈન્ટરનેશનલ એરપોર્ટ પર પાયાની સુવિધાઓના અભાવ અને નબળી જાળવણીની પોલ ફરી એકવાર ખુલી ગઈ છે. એરપોર્ટના મહત્વના ગણાતા કાર્ગો સેક્ટરમાં છેલ્લા 2 દિવસથી પાઇપલાઇનમાંથી અવિરત પાણી લીક થવાને કારણે આખો ફ્લોર પાણીથી જળબંબાકાર થઈ ગયો છે. કરોડો રૂપિયાના જંગી ખર્ચે તૈયાર થયેલા આ એરપોર્ટ પર આવી પ્રાથમિક સમસ્યાઓ અવારનવાર સામે આવતી હોવાથી મુસાફરો અને વેપારીઓમાં ભારે રોષ જોવા મળી રહ્યો છે. અગાઉ પણ વરસાદ દરમિયાન કન્વેયર બેલ્ટ પર પાણી ટપકવાની અને જર્મન ડોમ તૂટી જવાની ઘટનાઓ બની ચૂકી છે, જે તંત્રની કામગીરી પર મોટો સવાલ ખડો કરે છે.
આ ગંભીર લીકેજને કારણે પાણી સીધું જ ઇલેક્ટ્રિક બોર્ડ અને વાયરિંગ સુધી પહોંચી ગયું છે, જેથી ગમે ત્યારે મોટો અકસ્માત કે શોર્ટ સર્કિટ થવાની પૂરી શક્યતા છે. કર્મચારીઓની સુરક્ષાને ધ્યાનમાં રાખીને તત્કાલ અસરથી કાર્ગો લોડિંગની કામગીરી બંધ કરી દેવામાં આવી છે. કામગીરી ઠપ્પ થવાને કારણે ઈન્ડિગો એરલાઇન્સનો અંદાજે 2 લાખ રૂપિયાની કિંમતનો 4 ટન જેટલો મહત્વનો માલ સમયસર લોડ થઈ શક્યો નથી. એરપોર્ટ ડાયરેક્ટર દિગંત બોરાહના વહીવટ સામે પણ અગાઉ બેદરકારીના આક્ષેપો થઈ ચૂક્યા છે અને આ સિઝલિંગ સમસ્યાને બે દિવસ વીતવા છતાં હજુ સુધી કાયમી ઉકેલ આવ્યો નથી.
આંતરરાષ્ટ્રીય સ્તરના આ એરપોર્ટ પર માત્ર કાગળ પર જ સુવિધાઓ હોવાનું જણાય છે, કારણ કે સામાન્ય બસપોર્ટ જેવી પ્રાથમિક સુવિધાઓ પણ મુસાફરોને મળતી નથી. અગાઉ રનવે નજીકની 15 ફૂટની દીવાલ ધરાશાયી થવી, શૌચાલયમાં પાણી ખૂટી જવું અને મોબાઈલ નેટવર્ક કે વાઈ-ફાઈ જેવી સુવિધાઓનો અભાવ હોવાની ફરિયાદો અવારનવાર સામે આવી છે. જો આ પ્રકારની નબળી જાળવણી વહેલી તકે સુધારવામાં નહીં આવે, તો મુસાફરો અને વેપારીઓનું નુકસાન વધતું જશે અને લોકો રાજકોટને બદલે અમદાવાદથી હવાઈ મુસાફરી કરવા મજબૂર બનતા રહેશે.
