સુરત મહાનગરપાલિકા (SMC) દ્વારા શહેરની તમામ રહેણાંક, વાણિજ્યિક અને ઔદ્યોગિક મિલકતોનો એક અત્યાધુનિક ડિજિટલ ડેટાબેઝ તૈયાર કરવાની વ્યાપક કવાયત શરૂ કરવામાં આવી છે. મિલકત વેરાની આકારણી અને વાર્ષિક વસૂલાતને વધુ સચોટ અને પારદર્શક બનાવવા માટે પાલિકાએ આ મોટો નિર્ણય લીધો છે. વર્ષોથી ચાલી આવતી જૂની અને પરંપરાગત ઓફલાઇન પદ્ધતિને હવે કાયમ માટે તિલાંજલિ આપી દેવામાં આવી છે અને તેના બદલે આધુનિક ડિજિટલ ટેક્નોલોજીના સહારે ઘરે-ઘરે જઈને પ્રત્યક્ષ ચકાસણી કરવામાં આવશે, જેનાથી ટેક્સ ચોરી અને ગેરકાયદે બાંધકામના કિસ્સાઓ ખુલ્લા પડી જશે.
આ અભિયાન અંતર્ગત પાલિકાની વિશેષ ટીમો શહેરના તમામ વોર્ડ અને ઝોનમાં ફરીને મિલકતોની સ્થળ પર તપાસ કરશે. સર્વે દરમિયાન દરેક મિલકતનું જીપીએસ (GPS) લોકેશન ટેગ કરવામાં આવશે, જેથી ડિજિટલ મેપ પર દરેક પ્રોપર્ટીનું સાચું ભૌગોલિક સ્થાન નોંધી શકાય. પાલિકા દ્વારા ખાસ ડિઝાઇન કરાયેલી મોબાઈલ એપ દ્વારા સ્થળ પરથી જ મિલકતના માલિકની વિગતો, કાર્પેટ એરિયા, બાંધકામનો પ્રકાર અને વાસ્તવિક ઉપયોગીતા સીધી સર્વર પર અપલોડ કરવામાં આવશે. આ તપાસમાં મિલકત ધારકે મંજૂર કરાવેલો મૂળ પ્લાન, બીયુ પરમિશન, વાસ્તવિક બાંધકામ અને પ્રોપર્ટીનો ઉપયોગ રેણાંક છે કે કોમર્શિયલ તેની બારીકાઈથી ચકાસણી થશે અને વિસંગતતા જણાતા નવો સચોટ વેરો લાગુ કરવામાં આવશે.
આ ડિજિટલ વ્યવસ્થાથી મેન્યુઅલ પ્રક્રિયાની ખામીઓ અને ભ્રષ્ટાચારની ફરિયાદોનો અંત આવશે તેમજ પાલિકા પાસે દરેક મિલકતનો રિયલ-ટાઇમ રેકોર્ડ ઉપલબ્ધ બનશે. મિલકત વેરાની ચોરી અટકવાથી સુરત પાલિકાની મહેસૂલી આવકમાં મોટો વધારો થશે અને આ ફંડનો ઉપયોગ શહેરી વિકાસના કાર્યોમાં થઈ શકશે. આટલું જ નહીં, સામાન્ય નાગરિકો માટે પણ ભવિષ્યમાં નામ ટ્રાન્સફર કરાવવું, એસેસમેન્ટ કરવું અને ટેક્સ બિલની ચૂકવણી કરવી જેવી તમામ સરકારી સેવાઓ સંપૂર્ણપણે ડિજિટલ અને ખૂબ જ ઝડપી બની જશે.
