ચેન્નઈના પુલિયાન્થોપ વિસ્તારમાં રહેતા 37 વર્ષીય રૂબેન નામના કુખ્યાત હિસ્ટ્રીશીટરે સોશિયલ મીડિયા પર પોતાના ભાઈની હત્યાનો બદલો લેવાના ઈરાદાથી કેટલીક રીલ્સ અપલોડ કરી હતી. આ વીડિયોમાં તેણે ટીવી ક્રાઈમ ન્યૂઝ રિપોર્ટ જેવો અંદાજ અપનાવીને બે મુખ્ય ગેંગસ્ટરોને ટાર્ગેટ કર્યા હતા અને તેમને જલદી જ મોતની સજા આપીને માથું ધડથી અલગ કરવાની ખુલ્લી ધમકી આપી હતી. આ ભયાનક વીડિયો સોશિયલ મીડિયા પર વાયરલ થતાં જ પોલીસ હરકતમાં આવી ગઈ હતી અને તાત્કાલિક કાર્યવાહી હાથ ધરીને આરોપીને ઝડપી પાડ્યો હતો.
પોલીસ તપાસમાં બહાર આવ્યું છે કે પકડાયેલા આરોપી રૂબેનનો ગુનાહિત ઈતિહાસ ખૂબ જ લાંબો છે અને તેની સામે અગાઉથી જ 3 ગંભીર મર્ડર કેસ, 2 ખૂનના પ્રયાસના કેસ અને 2 એટીએમ લૂંટના પ્રયાસ સહિત કુલ 21 ગુનાઓ પોલીસ ચોપડે નોંધાયેલા છે. રૂબેનનો ભાઈ કવણકરાઈ રમેશ ઉર્ફે નાઈ રમેશ પણ એક હિસ્ટ્રીશીટર હતો, જેની વર્ષ 2020માં ગાર્ડન સરથ અને અભિનેશ નામના બે કુખ્યાત ગેંગસ્ટરોએ હત્યા કરી નાખી હતી. આ બંને આરોપીઓ અગાઉ કોર્ટમાંથી સજા ભોગવીને જેલમાંથી છૂટી ગયા હતા, જેના કારણે રૂબેનના મનમાં તેમની સામે પહેલેથી જ બદલાની આગ સળગી રહી હતી.
આ કેસની ગંભીરતાને ધ્યાનમાં રાખીને પોલીસ વિભાગની ખાસ એન્ટી-ગેંગસ્ટર્સ ટીમે ટેક્નિકલ સર્વેલન્સ અને બાતમીદારોની મદદથી સોશિયલ મીડિયા પર વાયરલ થયેલા વીડિયોના સ્ત્રોત સુધી પહોંચીને રૂબેનની ધરપકડ કરી લીધી છે. પોલીસ હવે એ દિશામાં પણ તપાસ કરી રહી છે કે આ પ્રકારના ગુનાહિત વીડિયો બનાવીને સોશિયલ મીડિયા પર વાયરલ કરવા પાછળ અન્ય કોઈના ઇશારા કે મદદ હતી કે નહીં. આ કાર્યવાહીથી વિસ્તારમાં ભારે ચર્ચા જાગી છે અને પોલીસે સોશિયલ મીડિયા પર ધમકીઓ આપનારા તત્વોને કડક ચેતવણી આપી છે.
