બનાસકાંઠા જિલ્લામાં કાગળ પર રહેલી દારૂબંધીની પોલ ખોલતી એક મોટી ઘટના કાંકરેજ તાલુકામાં સામે આવી છે. જિલ્લાની એલસીબી પાલનપુર ટીમને મળેલી ચોક્કસ બાતમીના આધારે આજે સવારે આંગણવાડા ગામની સીમમાં આવેલ એક ખેતરના મકાનમાં અચાનક દરોડો પાડવામાં આવ્યો હતો. આ દરોડા દરમિયાન પોલીસ પણ ચોંકી ઉઠે તેટલા મોટા પ્રમાણમાં વિદેશી દારૂ અને બિયરનો જથ્થો મળી આવ્યો હતો, જેની કિંમત રૂ. 3.04 લાખ આંકવામાં આવી રહી છે. જો કે, પોલીસના આગમનની ભણક લાગતા જ મુખ્ય આરોપી ખેતુભા નથુભા વાઘેલા સ્થળ પરથી નાસી છૂટવામાં સફળ રહ્યો હતો.
પોલીસ સૂત્રોના જણાવ્યા અનુસાર, આંગણવાડા નિવાસી ખેતુભા નથુભા વાઘેલાના કબજાના ખેતરમાં આવેલા રહેણાંક મકાનમાં છૂપી રીતે આ દારૂનો સંગ્રહ કરવામાં આવ્યો હતો. પોલીસે સ્થળ પરથી સઘન તપાસ કરીને વિદેશી દારૂની બોટલો અને બિયરના ટીન મળીને કુલ 1000 જેટલો જથ્થો કબ્જે કર્યો છે. આ મામલે જપ્ત કરાયેલો તમામ મુદ્દામાલ શિહોરી પોલીસને સોંપવામાં આવ્યો છે અને પ્રોહિબિશન ધારા હેઠળ ગુનો દાખલ કરીને આગળની તપાસ થરા પોલીસને સોંપવામાં આવી છે. હાલમાં પોલીસ દ્વારા ફરાર આરોપીને ઝડપી પાડવા માટે ચક્રો ગતિમાન કરવામાં આવ્યા છે અને સઘન તપાસ ચાલી રહી છે.
બીજી બાજુ, ગ્રામ્ય વિસ્તારમાં આટલી મોટી માત્રામાં દારૂનો જથ્થો છુપાયેલો હોવા છતાં સ્થાનિક બીટ પોલીસને તેની ગંધ સુદ્ધાં ન આવવી તે અત્યારે ભારે ચર્ચાનો વિષય બન્યો છે. બહારથી એલસીબી જેવી એજન્સીએ આવીને રેડ કરવી પડે તે સ્પષ્ટપણે સ્થાનિક પોલીસની નિષ્ક્રિયતા સામે મોટા સવાલો ખડા કરે છે. આ ઘટના બાદ જાગૃત નાગરિકો અને સ્થાનિક આગેવાનોમાં રોષ જોવા મળી રહ્યો છે, અને જિલ્લા પોલીસ વડા આ મામલાની ગંભીરતા સમજીને સંબંધિત બીટના પોલીસ કર્મીઓની ભૂમિકાની તપાસ કરે તથા કસૂરવાર સામે ખાતાકીય પગલાં લે તેવી પ્રબળ માંગ ઉઠી રહી છે.
