આણંદ જિલ્લાના બોરસદ તાલુકાના જંત્રાલ ગામે આવેલા પ્રસિદ્ધ શ્રી લાડુ ઝાંપડી માતાજીના મંદિર પરિસરમાં માતાજીના પ્રાગટય દિન નિમિત્તે 21મા શરદ પૂર્ણિમા મહોત્સવની અનોખી રંગત જોવા મળી હતી. આ ભવ્ય ધાર્મિક મહોત્સવને લઈને જંત્રાલ તેમજ આસપાસનાં 10 થી વધુ ગામોના શ્રદ્ધાળુઓમાં ભારે ઉત્સાહ અને આસ્થા જોવા મળ્યા હતા. સમગ્ર મંદિર પરિસર શ્રદ્ધા, ભક્તિભાવ અને ઉત્સવી માહોલથી છવાઈ ગયું હતું, જ્યાં વહેલી સવારથી જ ભક્તોની ભીડ જામી હતી.
મહોત્સવના પ્રારંભ પ્રસંગે ગુજરાત સરકારના કેબિનેટ મંત્રી રમણભાઈ સોલંકીના હસ્તે લોકમેળાને ખુલ્લો મૂકવામાં આવ્યો હતો. આ ઉપરાંત પરંપરાગત રીતે માંડવડીના દીપ પ્રજ્વલિત કરીને કેબિનેટ મંત્રી, જિલ્લા ભાજપ પ્રમુખ સંજયભાઈ પટેલ અને જિલ્લા પંચાયતના ઇન્ચાર્જ પ્રમુખ જીલુભા સિંધા સહિતના આમંત્રિત મહેમાનોએ શરદ પૂર્ણિમા ઉત્સવનો શુભારંભ કરાવ્યો હતો. ઉજવણીના ભાગરૂપે રાત્રે 10 વાગ્યે આકાશમાં રંગબેરંગી આતશબાજીનું ભવ્ય આયોજન કરવામાં આવ્યું હતું, જેના નયનરમ્ય નજારાએ ઉત્સવની રોનકમાં વધારો કર્યો હતો. ત્યારબાદ પ્રખ્યાત ગાયક અને સંગીત વૃંદના સથવારે ભવ્ય રાસ-ગરબા યોજાયા હતા, જેમાં ભક્તોએ ભક્તિ સંગીતના તાલે ગરબે ઘૂમીને માતાજીની આરાધના કરી હતી.
રાત્રે 12 વાગ્યે માતાજીની ભવ્ય મહાઆરતી યોજાઈ હતી, જેમાં માતાજીના જયઘોષ અને દીપપ્રજ્વલિત આરતીના દિવ્ય માહોલથી આખું મંદિર પરિસર ગુંજી ઊઠ્યું હતું. ભાવિક ભક્તોએ પોતાના પરિવાર સાથે હાજર રહીને માતાજીનાં દર્શન કરી ધન્યતા અનુભવી હતી. લોકમેળો, રાસ-ગરબા, આતશબાજી અને મહાઆરતી જેવા વિવિધ કાર્યક્રમોએ શરદ પૂર્ણિમાના આ પાવન પર્વને સૌના માટે હંમેશ માટે યાદગાર બનાવી દીધું હતું. ધાર્મિક આસ્થાની સાથેસાથે લોકપરંપરા અને સામૂહિક એકતાનો અદ્ભુત સંદેશ આપતો આ મહોત્સવ આ વિસ્તારના શ્રદ્ધાળુઓ માટે આકર્ષણનું મુખ્ય કેન્દ્ર બન્યો હતો.
