રાજકોટના કોઠારીયા રોડ પર આવેલા વિનોદ નગરમાં રહેતા અને હસતા-રમતા પરિવાર સાથે જીવન વિતાવતા 63 વર્ષીય સોમગીરી વિજયગિરી ગૌશ્વામિ પર આજે સવારે કાળમુખો સમય આવી ગયો હતો. વાંકાનેર રેલવે સ્ટેશન પર બનેલી એક હૃદયદ્રાવક ઘટનામાં સોમગીરીભાઈનું ટ્રેનની અડફેટે આવી જવાથી કરુણ મોત નીપજ્યું છે, જેને કારણે સમગ્ર પરિવારમાં આભ તૂટી પડ્યું છે.
મળતી વિગતો મુજબ, સોમગીરીભાઈ આજે સવારે વાંકાનેર રેલવે સ્ટેશનના પ્લેટફોર્મ નંબર 3 પર હાજર હતા. તેમને પ્લેટફોર્મ નંબર 2 પર જવાનું હોવાથી તેઓ નિયમ કે સાવધાની રાખવાને બદલે રેલવેના પાટા ક્રોસ કરીને જઈ રહ્યા હતા. બરાબર એ જ સમયે ત્યાંથી પૂરપાટ ઝડપે ટ્રેન આવી પહોંચી હતી. ટ્રેનની ઠોકર એટલી ભયાનક હતી કે સોમગીરીભાઈને માથા તેમજ મોઢાના ભાગે ગંભીર અને જીવલેણ ઇજાઓ પહોંચી હતી. લોહીલુહાણ હાલતમાં તેમણે ઘટનાસ્થળે જ દમ તોડી દીધો હતો.
આ દુર્ઘટના પાછળનું સૌથી દુઃખદ પાસું એ સામે આવ્યું છે કે મૃતક સોમગીરીભાઈને કાનથી બરાબર સંભળાતું ન હતું અને તેમની શ્રવણશક્તિ ઘણી નબળી હતી. ટ્રેન ચાલક દ્વારા પાટા પર વ્હીસલ વગાડવામાં આવી જ હશે, પરંતુ કાનની કમજોરીના કારણે સોમગીરીભાઈ ટ્રેનનો અવાજ કે વ્હીસલ સાંભળી શક્યા ન હતા. પરિણામે, તેઓ ખતરો ભાખી ન શક્યા અને ક્ષણભરમાં જ કાળનો ભોગ બની ગયા.
મૃતક સોમગીરીભાઈ પોતાના પરિવારમાં બે દીકરાઓના પિતા હતા અને ઘરનો વડીલ આધારસ્તંભ હતા. અચાનક બનેલી આ આકસ્મિક દુર્ઘટનાથી બંને દીકરાઓએ પિતાની છત્રછાયા ગુમાવી દીધી છે. આ સમાચાર રાજકોટના વિનોદ નગર વિસ્તારમાં પહોંચતા જ મિત્રો અને સગા-સંબંધીઓમાં શોકનું મોજું ફરી વળ્યું છે અને પરિવારના આક્રંદથી વાતાવરણ ભારે ગમગીન બન્યું છે. રેલવે સ્ટેશન જેવા જાહેર સ્થળોએ પાટા ક્રોસ કરતી વખતે જરાસ્ર સરખી બેદરકારી કે અસાાવધાની કેવું મોટું પરિણામ લાવી શકે છે, તેનો આ કમનસીબ કિસ્સો સાક્ષી પૂરે છે.
