આજકાલ સોશિયલ મીડિયા ખોલતાની સાથે જ કંઈક ને કંઈક નવું વાયરલ જોવા મળે છે. હાલમાં જ ઇન્ટરનેટ પર 'ફેરેટિન ફેસ' નામનો એક નવો જ ટ્રેન્ડ વાયરલ થઈ રહ્યો છે. ચર્ચા એવી છે કે ચહેરા પર દેખાતા કેટલાક બદલાવ શરીરમાં આયર્ન એટલે કે લોહતત્વની કમી તરફ ઈશારો કરે છે. આ વાયરલ વીડિયોઝ જોઈને ઘણા લોકો પોતાની મેળે જ ઘરમાં પડેલી આયર્નની ગોળીઓ કે સપ્લીમેન્ટ્સ ખાવાનું શરૂ કરી દે છે. પણ જરા થોભો, પત્રકાર તરીકે તમને સાચી સલાહ આપવી એ મારી ફરજ છે કારણ કે સોશિયલ મીડિયાની દરેક વાત આંખ બંધ કરીને માની લેવી ભારે પડી શકે છે.
આજે ફેસબુક, ઇન્સ્ટાગ્રામ કે સોશિયલ મીડિયાના અન્ય પ્લેટફોર્મ પર જે દેખાય છે તે બધું જ સાચું હોય તેવું જરૂરી નથી. નિષ્ણાત ડોક્ટર્સનું માનવું છે કે ચહેરા પર થતા ફેરફારો પાછળ આયર્ન ઉપરાંત બીજા ઘણા બધા હેલ્થ ઇશ્યુઝ પણ જવાબદાર હોઈ શકે છે. જો તમને શરીરમાં અશક્તિ કે નબળાઈ જેવું લાગે, તો સીધા મેડિકલ સ્ટોરે જઈને આયર્ન સપ્લીમેન્ટ્સ ખરીદી લેવાની ભૂલ ક્યારેય ન કરવી જોઈએ. વગર ડાક્ટરી સલાહે આ પ્રકારની દવાઓ લેવાથી લીવર કે પેટ પર ખરાબ અસર પડી શકે છે અને શરીરને ફાયદાની જગ્યાએ નુકસાન થઈ શકે છે.
કોઈપણ હેલ્થ પ્રોબ્લેમ કે આયર્નની કમી શંકાસ્પદ લાગે, તો સૌથી પહેલા હોસ્પિટલ જઈને પ્રોપર બ્લડ ટેસ્ટ કરાવવો જોઈએ. ડોક્ટર રિપોર્ટ ચેક કરીને જેટલી માત્રા કહે તેટલી જ દવાઓ લેવી સ્વાસ્થ્ય માટે હિતાવહ છે. ઇન્ટરનેટની દુનિયામાં વાયરલ થતી અડધી-અધૂરી માહિતી પાછળ દોડવા કરતાં પોતાની હેલ્થ બાબતે હંમેશા જાગૃત અને સચેત રહેવું જરૂરી છે. સેલ્ફ મેડિકેશન એટલે કે જાતે જ ડોક્ટર બની જવાની આદત ક્યારેક જીવલેણ પણ સાબિત થઈ શકે છે, તેથી સોશિયલ મીડિયાના આંધી-તુફાનમાં વહી જવાને બદલે હંમેશા એક્સપર્ટ ડોક્ટરની સલાહને જ પ્રાથમિકતા આપો.
