ભાવનગર જિલ્લાના માલણકા ગામે આવેલ પવિત્ર અવળકંધી માતાના મંદિરે વર્ષોથી પરંપરાગત રીતે તુલસી વિવાહ ઉત્સવની ઉજવણી કરવામાં આવે છે. આ વર્ષે આગામી શુક્રવારે યોજાનાર આ પવિત્ર ઉત્સવને લઈને મંદિર પરિસરમાં અનેક આકર્ષક આયોજનો કરવામાં આવ્યા છે. હિન્દુ ધર્મમાં દેવઉઠી અગિયારસથી કારતક પૂનમ વચ્ચે ઉજવાતા તુલસી વિવાહ એ ભગવાન વિષ્ણુના સ્વરૂપ શાલિગ્રામજી અને તુલસી માતાના પ્રતીકાત્મક વિવાહનો મહાપર્વ છે. તુલસીજીને લક્ષ્મીજીનું સ્વરૂપ માનવામાં આવતું હોવાથી આ ઉત્સવથી ઘરમાં સુખ, શાંતિ અને સમૃદ્ધિ જળવાઈ રહે છે તેવી લોકવાયકા છે, અને આ પર્વ સાથે જ લગ્ન તથા ગૃહપ્રવેશ જેવા માંગલિક કાર્યોનો શુભારંભ થાય છે.
આ ધાર્મિક મહોત્સવને વધુ દિવ્ય અને આકર્ષક બનાવવા માટે આ વખતે વિશેષ સુશોભન કરવામાં આવ્યું છે, જેમાં ગુજરાતની ઓળખ સમાન દ્વારકા અને બેટ દ્વારકા વચ્ચેના ભવ્ય 'સુદર્શન સેતુ'ની થીમને અદ્ભુત રીતે સાકાર કરવામાં આવી છે. રાત્રિના સમયે આ સેતુ અને સમગ્ર મંદિર પરિસર રંગબેરંગી રોશનીથી ઝળહળી ઉઠે છે, જેને જોઈને શ્રદ્ધાળુઓને સાક્ષાત દ્વારકામાં હોવાની દિવ્ય અનુભૂતિ થાય છે. આ અદભુત નજારાના દર્શન કરવા માટે દૂર-દૂરથી મોટી સંખ્યામાં ભક્તજનો માલણકા ગામે ઉમટી રહ્યા છે, અને સેવક સમુદાય દ્વારા દર વર્ષની જેમ આ વર્ષે પણ આયોજનને સફળ બનાવવા ભારે જહેમત ઉઠાવવામાં આવી છે.
મંદિરના ટ્રસ્ટી ભરતભાઈ બાંભણિયા (પટેલ)ના જણાવ્યા અનુસાર, આ વર્ષના ઉત્સવ સાથે મંદિરના આધ્ય સ્થાપક સંત ભૂપતબાપુની ૧૭મી પુણ્યતિથિ પણ સંકળાયેલી હોવાથી વિશેષ ધાર્મિક કાર્યક્રમો રાખવામાં આવ્યા હતા. આ પ્રસંગે યોજાયેલા ડાક ડમરૂના ભવ્ય કાર્યક્રમમાં પ્રખ્યાત કલાકારો અરવિંદભાઈ રાવળ (ચોગઠ) અને મહેશભાઈ રાવળ દ્વારા પ્રભુ ભક્તિના સુર રેલાવીને ઉપસ્થિત જનમેદનીને ભક્તિરસમાં તરબોળ કરી દીધી હતી. ધાર્મિક વિધિ અને ઉત્સવની પૂર્ણાહુતિ બાદ મંદિર દ્વારા ભક્તજનો માટે વિશાળ મહાપ્રસાદનું પણ સુંદર આયોજન કરવામાં આવ્યું છે, જેનાથી આ પર્વની ઉજવણી વધુ યાદગાર બની રહી છે.
