દર વર્ષની પરંપરાને જાળવી રાખીને આ વર્ષે પણ બેસતા વર્ષના શુભ દિવસે પરસ્પર સ્નેહ મિલન અને શુભેચ્છાઓની આપ-લે માટે રાજુલામાં એક વિશેષ શુભેચ્છા મુલાકાતનું આયોજન કરવામાં આવ્યું હતું. રાજુલા માર્કેટિંગ યાર્ડ સામેના વિજય ચોક ખાતે યોજાયેલા આ કાર્યક્રમમાં આસપાસના ગ્રામ્ય વિસ્તારો તેમજ શહેરી વિસ્તારમાંથી મોટી સંખ્યામાં લોકોએ ઉત્સાહભેર હાજરી આપી હતી. નવા વર્ષના પ્રારંભે એકબીજાને ભેટીને 'રામ-રામ' પાઠવવાનો આ દૌર લાંબો સમય સુધી ચાલ્યો હતો, જેનાથી સમગ્ર વાતાવરણ હર્ષોલ્લાસ અને ઉત્સવમય બની ગયું હતું.
આ સ્નેહમિલન સમારોહમાં રાજુલા, જાફરાબાદ અને ખાંભા પંથકના સ્થાનિક રાજકીય અગ્રણીઓ, સક્રિય કાર્યકરો, વેપારીઓ, અન્નદાતા ખેડૂતો તેમજ સાગરખેડૂઓએ મોટી સંખ્યામાં ઉપસ્થિત રહીને પૂર્વ ધારાસભ્ય અંબરીષભાઈ ડેરને નૂતન વર્ષાભિનંદન પાઠવ્યા હતા. ખાસ કરીને જાફરાબાદ તરફથી આવેલા વિશાળ સમુદ્ર જેવું દિલ ધરાવતા સાગરખેડૂ યુવાનો અને સાગરખેડૂ વિકાસ ચેરીટેબલ ટ્રસ્ટના પ્રમુખ કિશોરભાઈ આર. સોલંકી સહિતના અગ્રણીઓએ વિશેષરૂપે ઉપસ્થિત રહી નવા વર્ષની શુભકામનાઓ આપી હતી અને આગામી દિવસોમાં સામાજિક એકતા જાળવી રાખવાનો સંકલ્પ દોહરાવ્યો હતો.
આ ભવ્ય આયોજનમાં કોળી સમાજના અગ્રણી પ્રવીણભાઈ બારૈયા, શ્યામભાઈ, જીવનભાઈ બારૈયા, શૈલુબાપુ તેમજ વિવિધ મિત્ર મંડળો, સામાજિક કાર્યકરો અને રાજુલાની જનતા જનાર્દને ઉત્સાહપૂર્વક ભાગ લીધો હતો. જુદા જુદા સમાજના વડીલો અને અગ્રણીઓની ઉપસ્થિતિએ આ કાર્યક્રમને વધુ યાદગાર બનાવ્યો હતો. આવા આયોજનોથી સ્થાનિક સ્તરે ભાઈચારો અને પરસ્પર સહયોગની ભાવના વધુ મજબૂત બને છે, જેની સરાહના ઉપસ્થિત તમામ નાગરિકોએ કરી હતી.
