JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ટેકનોલોજી

અમેરિકાએ સુપરઈન્ટેલિજન્સની શોધ કરી છે, પરંતુ વૈશ્વિક નિયંત્રણો સ્વીકાર્ય નથી: ડોનાલ્ડ ટ્રમ્પ

અમેરિકાએ સુપરઈન્ટેલિજન્સની શોધ કરી છે, પરંતુ વૈશ્વિક નિયંત્રણો સ્વીકાર્ય નથી: ડોનાલ્ડ ટ્રમ્પ
ચીનના શેનઝેન ખાતે યોજાયેલી એપેક સમિટમાં અમેરિકી રાષ્ટ્રપતિ ડોનાલ્ડ ટ્રમ્પે જાહેરાત કરી હતી કે અમેરિકાએ 'સુપરઈન્ટેલિજન્સ' (SI) ની શોધ કરી છે. તેમણે આ ટેકનોલોજીના વિકાસ માટે વૈશ્વિક નિયમો કે નિયંત્રણો લાદવાનો સ્પષ્ટ ઇનકાર કર્યો હતો.

ચીનના શેનઝેન ખાતે યોજાયેલી ૩૩મી એપેક (APEC) આર્થિક નેતાઓની બેઠકને સંબોધિત કરતા અમેરિકી રાષ્ટ્રપતિ ડોનાલ્ડ ટ્રમ્પે આર્ટિફિશિયલ ઇન્ટેલિજન્સ અને સુપરઈન્ટેલિજન્સ (SI) ના ભવિષ્ય વિશે મહત્વપૂર્ણ નિવેદનો આપ્યા હતા. તેમણે સુપરઈન્ટેલિજન્સને ઔદ્યોગિક ક્રાંતિ પછીનું સૌથી મોટું ટેકોલોજિકલ પરિવર્તન ગણાવ્યું હતું. ટ્રમ્પે ગર્વપૂર્વક જણાવ્યું હતું કે અમેરિકાએ આ ક્ષેત્રે અગ્રેસર રહીને આ ક્રાંતિકારી ટેકનોલોજીની શોધ કરી છે, જે સમગ્ર વિશ્વમાં અસાધારણ સમૃદ્ધિ અને વિકાસના દ્વાર ખોલી રહી છે. જોકે, આ ટેકનોલોજીના અમુક સંભવિત જોખમો વિશે ચેતવણી આપતા તેમણે કહ્યું હતું કે આના નકારાત્મક પાસાઓથી બચવા માટે આપણે અત્યંત સાવચેત રહેવું પડશે અને યોગ્ય સુરક્ષા ઉપાયો વિકસાવવા પડશે.

ટેકનોલોજીની સુરક્ષા અને જોખમોની વાત કરવા છતાં, ટ્રમ્પે તેના વિકાસ પર કોઈપણ પ્રકારના આંતરરાષ્ટ્રીય કે વૈશ્વિક નિયંત્રણો મૂકવાની વાતને સદંતર ફગાવી દીધી હતી. તેમણે સ્પષ્ટ શબ્દોમાં જણાવ્યું હતું કે અમેરિકા એવી કોઈપણ વૈશ્વિક નીતિ કે નિયમનને સ્વીકારશે નહીં જે સુપરઈન્ટેલિજન્સની ગતિને અવરોધે અથવા નવીનતા (ઇનોવેશન) નો દમ ઘૂંટે. તેમનું માનવું છે કે કડક નિયંત્રણો ટેકનોલોજીના પ્રસારને અટકાવશે અને તેનાથી વૈશ્વિક સ્તરે વિકાસની સંભાવનાઓને નુકસાન પહોંચશે. તાજેતરમાં જ ભાર સહિતના દસ દેશો વચ્ચે સુરક્ષિત ટેકનોલોજી અને સપ્લાય ચેઈનને લગતી 'સેન ફ્રાન્સિસ્કો ડિક્લેરેશન' પર હસ્તાક્ષર થયા હોવા છતાં, ટ્રમ્પનું આ નિવેદન ટેકનોલોજી ક્ષેત્રે અમેરિકાની સ્વતંત્ર નીતિ અને વર્ચસ્વ જાળવી રાખવાના મક્કમ ઇરાદાને દર્શાવે છે.

આ સંબોધન દરમિયાન ટ્રમ્પે પોતાના વહીવટીતંત્રની આર્થિક ઉપલબ્ધિઓ અને વેપાર નીતિઓનો પણ ચિતાર આપ્યો હતો. તેમણે દાવો કર્યો હતો કે છેલ્લા ત્રણ મહિનામાં ફુગાવો બે ટકાથી નીચે રહ્યો છે, જે અન્ય દેશોની સરખામણીમાં મોટી સફળતા છે. ટેક્સમાં ઘટાડો, ડ્રિગ્યુલેશન અને વીસથી વધુ વેપાર કરારોને આર્થિક વિકાસનું શ્રેય આપતા તેમણે જણાવ્યું કે અમેરિકામાં મોટા પાયે નવા રોકાણો આવ્યા છે અને નિકાસ રેકોર્ડ સ્તરે પહોંચી છે. ટ્રમ્પે ઊર્જા ક્ષેત્રે અલાસ્કા પાઈપલાઈન પ્રોજેક્ટ અને વેનેઝુએલામાં અમેરિકી તેલ કંપનીઓની સક્રિયતાનો ઉલ્લેખ કરીને વૈશ્વિક વેપારમાં અમેરિકાના વિસ્તરતા પ્રભુત્વને પણ રેખાંકિત કર્યું હતું.

ટેકનોલોજી વિભાગના વધુ સમાચાર

LATEST ARTICLES