ભરૂચ જિલ્લામાં છેલ્લા કેટલાક સમયથી સીએનજી ગેસના ભાવમાં થઈ રહેલા અસહ્ય વધારાને કારણે સામાન્ય વર્ગના રિક્ષાચાલકોની આર્થિક સ્થિતિ કફોડી બની ગઈ છે. જયભારત ઓટો રિક્ષા એસોસિએશનના બેનર હેઠળ મોટી સંખ્યામાં એકત્ર થયેલા રિક્ષાચાલકોએ કલેક્ટર કચેરી પર પહોંચીને પોતાનો રોષ વ્યક્ત કર્યો હતો. એસોસિએશનના જણાવ્યા અનુસાર, ગુજરાત ગેસનો સીએનજી ભાવ પ્રતિ કિલો 93.76 રૂપિયા અને અદાણી સીએનજીનો ભાવ તો સીધો 100 રૂપિયા સુધી પહોંચી ગયો છે. ઇંધણના આ તોતિંગ ભાવવધારાને કારણે રિક્ષાચાલકોની દૈનિક કમાણીનો મોટો હિસ્સો ગેસ પુરાવવામાં જ ખર્ચાઈ જાય છે, જેના લીધે તેમના માટે પોતાના પરિવારનું ગુજરાન ચલાવવું અત્યંત મુશ્કેલ બની ગયું છે.
આ સ્થિતિમાંથી બહાર આવવા માટે રિક્ષાચાલકોએ સરકાર સમક્ષ સીએનજીના ભાવમાં રાહત આપવા અથવા ગેસ ખરીદી પર સબસિડી પૂરી પાડવાની પ્રબળ માંગ કરી છે. મોંઘવારીના આ સમયમાં માત્ર ઇંધણના પ્રશ્નો જ નહીં, પરંતુ ઓલા, ઉબેર અને રેપિડો જેવી એપ આધારિત ખાનગી વાહન સેવાઓ દ્વારા થતા નિયમોના ઉલ્લંઘનનો મુદ્દો પણ ઉઠાવવામાં આવ્યો હતો. એસોસિએશને આ પ્રકારની ગેરકાયદેસર અને અનધિકૃત સેવાઓ સામે સત્વરે કડક તપાસ કરી યોગ્ય કાયદેસરની કાર્યવાહી કરવાની માંગણી કરી છે, જેથી સ્થાનિક રિક્ષાચાલકોના રોજી-રોટીના પ્રશ્નો હલ થઈ શકે.
આ ઉપરાંત, વર્ષ 2021માં ગુજરાત સરકાર દ્વારા જાહેર કરવામાં આવેલા નવા રિક્ષા ભાડાના નિયમોનો ભરૂચ શહેર અને તાલુકામાં કડકાઈથી અમલ કરવામાં આવે તેવી પણ વિશેષ રજૂઆત કરવામાં આવી હતી. રિક્ષાચાલકોએ ચીમકી ઉચ્ચારી છે કે જો વહેલી તકે તેમની આ તમામ માંગણીઓનો સંતોષકારક નિકાલ નહીં આવે, તો તેઓ આગામી દિવસોમાં ગાંધીચિંધ્યા માર્ગે ઉગ્ર આંદોલન કરવાની ફરજ પડશે. તંત્ર દ્વારા આ મામલે યોગ્ય પગલાં ભરવામાં નહીં આવે તો રોષે ભરાયેલા રિક્ષાચાલકો રસ્તા પર ઉતરીને વિરોધ પ્રદર્શનો વધુ તીવ્ર બનાવશે.
