JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
બિઝનેસ

યુએનડીઆરઆર દ્વારા ગિફ્ટ સિટીને ભારતના પ્રથમ એમસીઆર૨૦૩૦ રેઝિલિયન્સ હબ તરીકે ગૌરવવંતી માન્યતા

યુએનડીઆરઆર દ્વારા ગિફ્ટ સિટીને ભારતના પ્રથમ એમસીઆર૨૦૩૦ રેઝિલિયન્સ હબ તરીકે ગૌરવવંતી માન્યતા
સંયુક્ત રાષ્ટ્રની ડિઝાસ્ટર રિસ્ક રિડક્શન ઓફિસે ગિફ્ટ સિટીને ભારતના પ્રથમ અને એશિયા-પેસિફિક ક્ષેત્રના અત્યાધુનિક રેઝિલિયન્સ હબ તરીકે સ્વીકાર્યું છે, જે આપત્તિ વ્યવસ્થાપન ક્ષેત્રે દેશ માટે એક મોટી સિદ્ધિ છે.

ભારતના અગ્રણી ગ્લોબલ ફાઇનાન્સ-ટેક હબ તરીકે નામના મેળવનાર ગિફ્ટ સિટીએ હવે આપત્તિ સામે સજ્જતા અને રિસ્ક મેનેજમેન્ટમાં પણ સીમાચિહ્નરૂપ સફળતા હાંસલ કરી છે. સંયુક્ત રાષ્ટ્રની ડિઝાસ્ટર રિસ્ક રિડક્શન ઓફિસ (UNDRR) દ્વારા ગિફ્ટ સિટીને અધિકૃત રીતે ભારતના પ્રથમ 'મેકિંગ સિટીઝ રેઝિલિયન્ટ ૨૦૩૦' (MCR2030) રેઝિલિયન્સ હબ તરીકે જાહેર કરવામાં આવ્યું છે. આ વિશેષ માન્યતા મળવાથી ગિફ્ટ સિટી હવે એશિયા અને પેસિફિક ક્ષેત્રનું સૌથી નવું અને અતિ મહત્વનું રેઝિલિયન્સ હબ બની ગયું છે. આ સિદ્ધિ માત્ર ગિફ્ટ સિટી જ નહીં પરંતુ સમગ્ર ભારત માટે વૈશ્વિક સ્તરે ગર્વની ક્ષણ છે, કારણ કે હવે તે આંતરરાષ્ટ્રીય સ્તરે આપત્તિ સામે ટકી રહેવાની ક્ષમતા વિકસાવવામાં અગ્રેસર બન્યું છે.

કોઈપણ આંતરરાષ્ટ્રીય નાણાકીય અને ટેક્નોલોજી કેન્દ્ર માટે લોકોની સુરક્ષા, આવશ્યક સેવાઓની અનિવાર્ય સતતતા અને વ્યવસાયિક વિશ્વાસ જાળવી રાખવો એ અત્યંત પાયાની જરૂરિયાત છે. ગિફ્ટ સિટીના મેનેજિંગ ડિરેક્ટર અને ગ્રુપ સીઈઓ સંજય કૌલના જણાવ્યા અનુસાર, આ માન્યતાથી શહેરના વિકાસમાં આપત્તિ સામેની તૈયારીઓને અભિન્ન અંગ બનાવવાનો સંકલ્પ વધુ દ્રઢ બન્યો છે. ગુજરાત ઇન્સ્ટિટ્યૂટ ઑફ ડિઝાસ્ટર મેનેજમેન્ટના સહયોગ અને યુએનડીઆરઆરના માર્ગદર્શન હેઠળ ગિફ્ટ સિટી જુલાઈ ૨૦૨૨માં આ વૈશ્વિક પહેલ સાથે જોડાયું હતું. રોડમેપના વિવિધ ચરણો સફળતાપૂર્વક પાર કરીને સંસ્થાએ જૂન ૨૦૨૩માં ડિઝાસ્ટર રેઝિલિયન્સ સ્કોરકાર્ડના આધારે એક્શન પ્લાન તૈયાર કર્યો હતો, જેનો વર્તમાન સમયમાં ખૂબ જ સફળતાપૂર્વક અમલ થઈ રહ્યો છે.

શહેરી વિસ્તારોમાં આપત્તિ સામેની સજ્જતાને મજબૂત બનાવવા માટે ગિફ્ટ સિટી દ્વારા અત્યંત સરાહનીય વ્યવસ્થાઓ ઊભી કરવામાં આવી છે. અહીં ક્રાઇસિસ મેનેજમેન્ટ ગ્રૂપ, ઇન્સિડન્ટ રિસ્પોન્સ સિસ્ટમ અને સમર્પિત ડિઝાસ્ટર મેનેજમેન્ટ અધિકારીઓ દ્વારા બિલ્ડિંગ અને યુટિલિટી સ્તરે સઘન આયોજન કરવામાં આવ્યું છે. ભૂકંપ કે આગ જેવી અણધારી કટોકટીનો સામૂહિક સામનો કરવા માટે અત્યાર સુધીમાં ૧૫થી વધુ મોકડ્રિલ યોજવામાં આવી છે તેમજ ૩૬થી વધુ પ્રકારનાં અત્યાધુનિક સાધનોનો સંગ્રહ કરાઈ અલગ વ્યવસ્થા ગોઠવવામાં આવી છે. આ ઉપરાંત, હવામાન વિભાગ અને એનડીએમએના સચેત પ્લેટફોર્મ સાથે જોડાયેલું અર્લી-વોર્નિંગ ફ્રેમવર્ક અને સ્વયંસેવકોનું મજબૂત નેટવર્ક ગિફ્ટ સિટીને કોઈપણ આપત્તિ સામે સંપૂર્ણ સુરક્ષિત અને સક્ષમ નગર બનાવે છે.

LATEST ARTICLES