JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
કૃષિ

વડોદરાના શિનોરમાં એસકેવાય યોજનાના વિરોધ વચ્ચે એમજીવીસીએલની મનમાની, ૫૫ ખેડૂતોની અરજી સ્વીકારવાનો ઇનકાર

વડોદરાના શિનોરમાં એસકેવાય યોજનાના વિરોધ વચ્ચે એમજીવીસીએલની મનમાની, ૫૫ ખેડૂતોની અરજી સ્વીકારવાનો ઇનકાર
વડોદરાના શિનોર તાલુકાના ખેડૂતો દ્વારા એસકેવાય યોજનામાંથી બહાર નીકળવા માટે આપેલી અરજીઓ સ્વીકારવાનો વીજ કંપનીએ ઇનકાર કર્યો છે. સરકારના સ્પષ્ટ આદેશો હોવા છતાં વીજ કંપનીના આવા અણઘડ વલણથી ખેડૂતોમાં ભારે રોષ ભભૂકી ઉઠ્યો છે.

વડોદરા જિલ્લાના શિનોર તાલુકાના મોટા ફોફળિયા ગામના ઝાંઝડ ફીડર હેઠળ આવતા ૫૫ જેટલા અસરગ્રસ્ત ખેડૂતો પોતાની તૈયાર અરજીઓ લઈને સ્થાનિક વીજ કચેરીએ પહોંચ્યા હતા. આ ખેડૂતો વર્ષોથી ચાલી રહેલી એસકેવાય (SKY) યોજનામાંથી મુક્તિ મેળવવા માટે 'વન ટાઈમ એક્ઝિટ ઓપ્શન' હેઠળ અરજી કરવા ગયા હતા. પરંતુ શિનોર એમજીવીસીએલના ડેપ્યુટી ઈજનેરે ખેડૂતોની આ તૈયાર અરજીઓ સ્વીકારવાની સાફ ના પાડી દીધી હતી અને માત્ર કંપનીના નિયત ફોર્મમાં જ અરજી કરવાનો આગ્રહ રાખ્યો હતો. અધિકારીએ લેખિતમાં પણ અરજીઓ લેવાનો ઇનકાર કરતા ખેડૂતોમાં ન્યાય મેળવવા માટે ફરી એકવાર સંઘર્ષ કરવાનો સમય આવી ગયો છે.

ખેડૂતોનો મુખ્ય આક્ષેપ છે કે વીજ કંપનીના પોતાના નિયત ફોર્મમાં વીજ જોડાણને નવા ટેરિફમાં તબદીલ કરવાની જોગવાઈ રાખવામાં આવી છે, જે ખેડૂતો માટે આર્થિક રીતે અત્યંત નુકસાનકારક સાબિત થઈ શકે છે. આ યોજના સામે ખેડૂતો છેલ્લા સાત વર્ષથી સતત કાનૂની લડત લડી રહ્યા છે, જેમાં હાઈકોર્ટમાં પણ લાંબી કાર્યવાહી ચાલી હતી. અદાલતી પ્રક્રિયાના અંતે ઊર્જા વિભાગ દ્વારા ગત ૩૦ ઓક્ટોબરના રોજ 'વન ટાઈમ એક્ઝિટ' અંગે સ્પષ્ટ આદેશો પણ જારી કરવામાં આવ્યા હતા. આમ છતાં, સ્થાનિક સ્તરે વીજ કંપની દ્વારા સરકારી નિયમોનું પાલન કરવાને બદલે ખેડૂતો પર નવી અને અન્યાયી શરતો લાદવામાં આવી રહી છે, જેને લઈને અન્નદાતાઓમાં ભારે નિરાશા અને રોષ જોવા મળી રહ્યો છે.

આ વિસ્તારના ખેડૂતો ઓછા વરસાદને કારણે પહેલેથી જ ગંભીર મુશ્કેલીઓનો સામનો કરી રહ્યા છે, અને એવા સંજોગોમાં પાકને બચાવવા માટે વીજળી અત્યંત આવશ્યક બની જાય છે. વીજ કંપનીના આ અસહકારભર્યા વલણના કારણે ખેડૂતોને પોતાના જ હક માટે કચેરીઓના ધક્કા ખાવા પડી રહ્યા છે. પીડિત ખેડૂતોએ માંગ કરી છે કે રાજ્ય સરકાર આ મામલામાં ત્વરિત હસ્તક્ષેપ કરીને વીજ કંપનીને યોગ્ય આદેશ આપે અને તેમના જોડાણો જૂના કૃષિ ટેરિફમાં પુનઃસ્થાપિત કરાવે. જો આ વાજબી માંગણી વહેલી તકે નહીં સંતોષાય, તો આગામી દિવસોમાં ગાંધીચીંધ્યા માર્ગે ઉગ્ર આંદોલન કરવાની ચીમકી પણ ખેડૂતો દ્વારા ઉચ્ચારવામાં આવી છે.

LATEST ARTICLES