JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ધર્મ

સાળંગપુરધામમાં લાભ પાંચમ અને શનિવારના સંયોગે હજારો ભક્તોએ કષ્ટભંજનદેવના દર્શન કર્યા

સાળંગપુરધામમાં લાભ પાંચમ અને શનિવારના સંયોગે હજારો ભક્તોએ કષ્ટભંજનદેવના દર્શન કર્યા
પ્રખ્યાત સાળંગપુરધામમાં પવિત્ર કાર્તિક માસના પ્રથમ શનિવાર અને લાભ પાંચમના સુભગ સંયોગે કષ્ટભંજનદેવને દિવ્ય શણગાર કરાયો હતો. વહેલી સવારથી જ હજારોની સંખ્યામાં ઉમટેલા ભક્તોની ભક્તિથી સમગ્ર મંદિર પરિસર ગુંજી ઉઠ્યું હતું.

શ્રી સ્વામિનારાયણ મંદિર વડતાલધામ સંચાલિત વિશ્વપ્રસિદ્ધ શ્રી કષ્ટભંજનદેવ હનુમાનજી મંદિરમાં પ.પૂ. શાસ્ત્રી સ્વામી હરિપ્રકાશદાસજીની પ્રેરણાથી અને કોઠારીશ્રી વિવેકસાગરદાસજી સ્વામીના માર્ગદર્શન હેઠળ વિશેષ આયોજન કરવામાં આવ્યું હતું. શનિવારના પવિત્ર દિવસે દાદાને ઊનના પતંગિયા તથા સૂર્યમુખી આકારની સુંદર ભાતવાળા મનોહર વાઘા પહેરાવવામાં આવ્યા હતા, સાથે જ રિયલ ડાયમંડ જડિત મુગટથી તેમનો અલૌકિક શણગાર કરાયો હતો. આ દિવ્ય સ્વરૂપના દર્શન કરી ધન્યતા અનુભવવા માટે દૂર-દૂરથી શ્રદ્ધાળુઓ વહેલી સવારથી જ મંદિરના પ્રાંગણમાં કતારબદ્ધ થઈ ગયા હતા.

ઉત્સવના આ પર્વ પર ભગવાન સમક્ષ વિવિધ પ્રકારની મિઠાઈઓનો ભવ્ય અન્નકૂટ પણ ધરવામાં આવ્યો હતો. વહેલી સવારે ૫:૩૦ કલાકે કોઠારીશ્રી વિવેકસાગરદાસજી સ્વામીના હસ્તે મંગળા આરતી સંપન્ન થઈ હતી, ત્યારબાદ સવારે ૭ કલાકે વડતાલ ગાદી પીઠાધિપતિ પ.પૂ.ધ.ધુ. ૧૦૦૮ આચાર્ય મહારાજશ્રી રાકેશપ્રસાદજીએ દિવ્ય શણગાર આરતી ઉતારી હતી. કારતક સુદ પાંચમ એટલે કે લાભ પાંચમ અને કાર્તિક માસના પ્રથમ શનિવારના આ દુર્લભ સંયોગને કારણે મંદિરમાં શ્રદ્ધાળુઓનો ભારે ધસારો જોવા મળ્યો હતો, જેમાં નાના બાળકોથી લઈને વડીલો સુધીના તમામ લોકોએ ભારે ઉત્સાહભેર ભાગ લીધો હતો.

સમગ્ર મંદિર પરિસરમાં 'જય શ્રી રામ' અને 'જય શ્રી કષ્ટભંજન દેવ' ના ગગનભેદી નારાઓ સાથે ભક્તિમય માહોલ છવાઈ ગયો હતો. ભક્તોની આ અસિમ ભીડ અને સુરક્ષા વ્યવસ્થાને ધ્યાનમાં રાખીને મંદિર પ્રશાસન દ્વારા આગવી અને ઉત્તમ વ્યવસ્થાઓ ગોઠવવામાં આવી હતી, જેથી દરેક શ્રદ્ધાળુ સુગમતાપૂર્વક દાદાના દર્શનનો લાભ લઈ શકે. આ ભવ્ય આયોજને સાળંગપુરધામને સાચા અર્થમાં આસ્થા અને ભક્તિના મહાસાગરમાં પરિવર્તિત કરી દીધું હતું.

LATEST ARTICLES