JAMNAGAR 361005 GUJARAT, INDIA
મુખ્ય પાના પર પાછા જાઓ
JAMNAGAR MIRROR
ગુજરાત

ખંભાળીયામાં રૂ. ૩૧ કરોડથી વધુના ખર્ચે નવો ફોર લેન કેનેડી બ્રિજ બનશે, ખાતમુહૂર્ત સંપન્ન

ખંભાળીયામાં રૂ. ૩૧ કરોડથી વધુના ખર્ચે નવો ફોર લેન કેનેડી બ્રિજ બનશે, ખાતમુહૂર્ત સંપન્ન
ખંભાળીયાના અત્યંત જર્જરિત થઈ ગયેલા ઐતિહાસિક કેનેડી બ્રિજને બદલે નવો અદ્યતન ફોર લેન બ્રિજ બનાવવાનું નક્કી કરવામાં આવ્યું છે. રૂા. ૩૧.૩૦ કરોડના જંગી ખર્ચે નિર્માણ થનાર આ નવા પુલથી આસપાસના વિસ્તારોના વાહનવ્યવહારને મોટી રાહત મળશે.

ખંભાળીયા શહેરમાં આવેલા જૂના કેનેડી બ્રિજની સ્થિતિ અત્યંત જર્જરિત થઈ જવાના કારણે અને તે ચાલવા માટે પણ સુરક્ષિત ન રહેતા ખાનગી કંપનીના અભિપ્રાય બાદ આ રસ્તો સુરક્ષાના ભાગરૂપે બંધ કરવામાં આવ્યો હતો. અગાઉ આ પુલને તોડીને નવો પુલ બનાવવા માટે રૂા. ૨૯ કરોડનો ખર્ચ મંજુર કરાયો હતો. જો કે, સ્થાનિક સિનિયર સિટીઝનો અને આગેવાનો દ્વારા લોખંડ તથા સિમેન્ટ વગર બનેલા આ પ્રાચીન કમાનવાળા એન્જિનિયરિંગ કૌશલ્યસમા પુલને જીવંત રાખવાની વિશેષ રજૂઆત કરવામાં આવી હતી. જેને ધ્યાને રાખીને ધારાસભ્ય મૂળુભાઈ બેરાના પ્રયાસોથી ખાસ કિસ્સામાં જૂના પુલને યથાવત રાખી તેની બાજુમાં જ નવો અત્ધુનિક પુલ બનાવવાની યોજના મંજૂર કરવામાં આવી છે.

આ નવા નિર્માણ પામનારા પુલની વિશેષતાઓની વાત કરીએ તો, તે અંદાજે રૂા. ૩૧.૩૦ કરોડના ખર્ચે તૈયાર થશે. આ પ્રોજેક્ટ અંતર્ગત ૨૧.૪ મીટરની લંબાઈના છ ગાળાવાળો આધુનિક ફોર લેન બ્રિજ બનાવવામાં આવશે. જેમાં વાહનચાલકોની સુવિધા માટે સ્પેશિયલ સર્વિસ રોડ અને પ્રોટેક્ટિવ વોલ સહિતની તમામ આધુનિક સુવિધાઓનું નિર્માણ કરવામાં આવશે. અગાઉ આ પુલ સિંગલ રોડ હોવાને કારણે ત્યાંથી બે ટ્રક પણ સાથે પસાર થઈ શકતા ન હતા, પરંતુ હવે ફોર લેન બ્રિજ બનવાથી વાહનવ્યવહાર અત્યંત સરળ અને સુરક્ષિત બનશે.

આ મહત્વપૂર્ણ પ્રોજેક્ટના શુભારંભ અર્થે આજે સ્થાનિક અગ્રણીઓ, પબ્લિક વર્કસ ડિપાર્ટમેન્ટ (પી.ડબલ્યુ.ડી.) ના અધિકારીઓ તેમજ નગરપાલિકાના સદસ્યોની વિશેષ ઉપસ્થિતિમાં ખાતમુહૂર્ત વિધિ સંપન્ન કરવામાં આવી હતી. આ નવા કેનેડી બ્રિજના નિર્માણથી ખંભાળીયાથી ભાણવડ અને કલ્યાણપુર તરફ જતા નાગરિકો તેમજ વેપારીઓને ભારે ટ્રાફિક સમસ્યામાંથી કાયમ માટે મુક્તિ મળશે. આ માળખાકીય સુવિધાથી પ્રદેશના વિકાસને વેગ મળશે અને મુસાફરોની અવરજવર વધુ સુગમ બનશે તેમ સ્થાનિક લોકોમાં ભારે હર્ષની લાગણી છવાઈ છે.

LATEST ARTICLES