સુરતમાં પાટીદાર અનામત આંદોલનને લઈને પાસ કન્વીનર ગીતા પટેલે એક મોટું નિવેદન આપીને રાજકીય ચર્ચાઓને વેગ આપ્યો છે. તેમણે સ્પષ્ટ શબ્દોમાં જણાવ્યું હતું કે ભૂતકાળમાં આનંદીબેન પટેલને મુખ્યમંત્રી પદ ગુમાવવું પડ્યું હતું, તેની પાછળ આંદોલનકારીઓની કોઈ ભૂલ નહોતી. અગાઉ દિનેશ બાંભણિયાએ જસદણના મંચ પરથી સારા મુખ્યમંત્રીને સત્તામાંથી ઉતારવા પડ્યા હોવાનો અફસોસ વ્યક્ત કરીને માફી માંગવાની ઇચ્છા વ્યક્ત કરી હતી. આ સંદર્ભમાં પ્રતિક્રિયા આપતા ગીતા પટેલે સ્પષ્ટ કર્યું હતું કે દિનેશ બાંભણિયા જો માફી માંગવા માંગતા હોય તો તે તેમનો વ્યક્તિગત નિર્ણય હોઈ શકે છે, પરંતુ સમગ્ર આંદોલનકારીઓ વતી માફી માંગવાનો કોઈ પ્રશ્ન ઉપસ્થિત થતો નથી કારણ કે અમારી કોઈ ભૂલ નહોતી.
આંદોલન દરમિયાન બનેલી ઘટનાઓને યાદ કરતા ગીતા પટેલે રાજ્ય સરકાર અને તંત્ર સામે ગંભીર સવાલો પણ ઉઠાવ્યા હતા. તેમણે આંદોલનકાળ દરમિયાન પાટીદારો પર થયેલા પોલીસ ગોળીબાર અને તેમાં ૧૪ જેટલા યુવાનોના થયેલા મૃત્યુ મામલે જવાબદારી નક્કી કરવાની માંગ કરી હતી. આ દુખદ ઘટનામાં 'જનરલ ડાયર' જેવી ભૂમિકા ભજવનાર કોણ હતા તે બાબત સ્પષ્ટ થવી અત્યંત આવશ્યક છે તેમ તેમણે ઉમેર્યું હતું. ગીતા પટેલના આ તેવરોથી સ્પષ્ટ થાય છે કે આંદોલન સાથે જોડાયેલા આગેવાનોના આંતરિક મંચ પર હજુ પણ ભૂતકાળની ઘટનાઓ અંગે મતભેદો અને અસંતોષ પ્રવર્તી રહ્યો છે.
વધુમાં ભાજપના આંતરિક રાજકારણ પર પ્રહાર કરતા ગીતા પટેલે જણાવ્યું હતું કે કોઈપણ આંદોલન હંમેશા સરકાર સામે જ લડવામાં આવે છે, જેમાં સરકાર કોઈની પણ હોઈ શકે છે. તે સમયે મુખ્યમંત્રી અને ગૃહમંત્રી બંને પાટીદાર સમાજમાંથી જ આવતા હોવા છતાં ભાજપના આંતરિક વિવાદ અને ખેંચતાણને કારણે આનંદીબેન પટેલને પદ છોડવું પડ્યું હતું. પક્ષના આંતરિક વિખવાદનો પૂરેપૂરો દોષ પાટીદાર આંદોલન પર ઢોળી દેવો તદ્દન વ્યાજબી નથી. ગીતા પટેલના આ નિવેદનને કારણે પાટીદાર અનામત આંદોલનના નેતાઓ વચ્ચેના અલગ-અલગ અભિગમો અને રાજકીય સમીકરણો ફરી એકવાર સપાટી પર આવ્યા છે.
