વડાપ્રધાન નરેન્દ્ર મોદીના નેતૃત્વ અને માર્ગદર્શન હેઠળ દેશના વિવિધ ક્ષેત્રો સતત પ્રગતિ કરી રહ્યા છે અને વૈશ્વિક સ્તરે ભારતની સિદ્ધિઓમાં નવો અધ્યાય જોડાઈ રહ્યો છે. આ જ શ્રૃંખલામાં ગુજરાતના સમૃદ્ધ ઐતિહાસિક વારસાને ઉજાગર કરતા ‘અનંત અનાદી વડનગર મ્યુઝીયમ’ને આંતરરાષ્ટ્રીય જ્યુરી દ્વારા અત્યંત પ્રતિષ્ઠિત એવા 'રેડ ડોટ: બેસ્ટ ઓફ ધ બેસ્ટ એવોર્ડ ૨૦૨૬' માટે પસંદ કરવામાં આવ્યું છે. વિશ્વભરમાં ડિઝાઇન અને આર્કિટેક્ચરક્ષેત્રે ઉત્કૃષ્ટ કામગીરી માટે અપાતા આ પુરસ્કારે વડનગરની ધરતીને ફરી એકવાર વૈશ્વિક નકશા પર ઝળકાવી દીધી છે.
આંતરરાષ્ટ્રીય મંચ પર ભારતનું પ્રતિનિધિત્વ કરતા આ મ્યુઝીયમે આ સિદ્ધિ મેળવીને નવો ઇતિહાસ રચ્યો છે. આ એવોર્ડ પ્રાપ્ત કરનારું આ ભારતનું પ્રથમ અને એકમાત્ર મ્યુઝીયમ છે, જે સમગ્ર દેશ માટે ગર્વની વાત છે. ભુજના 'સ્મૃતિવન' બાદ ગુજરાતના ખાતામાં 'રેડ ડોટ' એવોર્ડ મેળવવાની આ બીજી મોટી ઉપલબ્ધિ છે. આ વૈશ્વિક સન્માનથી માત્ર ગુજરાતની ઐતિહાસિક ધરોહર જ નહીં, પરંતુ અહીંની અત્યાધુનિક મ્યુઝીયમ ડિઝાઇન અને ક્યુરેશન પદ્ધતિને પણ આંતરરાષ્ટ્રીય સ્તરે વિશેષ સ્વીકૃતિ અને નવી ઓળખ પ્રાપ્ત થઈ છે.
વડનગર મ્યુઝીયમને મળેલી આ અભૂતપૂર્વ સફળતાથી સમગ્ર રાજ્યમાં ખુશીની લહેર દોડી ગઈ છે. મુખ્યમંત્રી ભુપેન્દ્ર પટેલે સોશિયલ મીડિયાના માધ્યમથી આ ભવ્ય સિદ્ધિને વધાવતા ખુશી વ્યક્ત કરી હતી અને રાજ્યના સાંસ્કૃતિક વારસાને જીવંત રાખવાના આ પ્રયાસને બિરદાવ્યો હતો. વિશ્વભરના ડિઝાઇન અને કલા જગતમાં પ્રતિષ્ઠિત ગણાતા આ એવોર્ડથી ભવિષ્યમાં રાજ્યના પર્યટન ક્ષેત્રને પણ વેગ મળશે અને દેશ-વિદેશના પ્રવાસીઓ ગુજરાતના ભવ્ય ઇતિહાસથી માહિતગાર થશે.
