ભારતના પૂર્વ વડાપ્રધાન રાજીવ ગાંધીના પત્ની સોનિયા ગાંધીએ તેમના પુસ્તક 'બિલોંગિંગ: અ જર્ની ઓફ લવ'માં ૨૧ મે ૧૯૯૧ના એ ગોઝારા દિવસને વાગોળ્યો છે, જ્યારે તમિલનાડુના શ્રીપેંલબુદુર ખાતે એક બોમ્બ વિસ્ફોટમાં રાજીવ ગાંધીનું દુઃખદ અવસાન થયું હતું. આ ઘટનાને યાદ કરતા સોનિયા ગાંધીએ જણાવ્યું કે, આ દુર્ઘટનાના માત્ર બે મહિના પહેલા જ તેમના પુત્ર રાહુલ ગાંધીએ પિતાની સુરક્ષા અંગે એક ડરામણી આગાહી કરી હતી. રાહુલે પિતા સાથેની સફર દરમિયાન માતાને ચેતવણી આપતા કહ્યું હતું કે, જો પિતાની સુરક્ષા બાબતે યોગ્ય પગલાં નહીં લેવામાં આવે, તો તેમણે ટૂંક સમયમાં જ પિતાની અંતિમક્રિયા માટે પાછા આવવું પડશે.
પુસ્તકમાં ખુલાસો કરવામાં આવ્યો છે કે રાજીવ ગાંધીની હત્યાના થોડા સમય પહેલા જ વી.પી. સિંહ સરકાર દ્વારા તેમની એસ.પી.જી. (સ્પેશિયલ પ્રોટેક્શન ગ્રૂપ) સુરક્ષા પાછી ખેંચી લેવામાં આવી હતી. સુરક્ષા સમિતિની ભલામણો હોવા છતાં કોઈપણ પ્રકારની નવી સમીક્ષા વગર આ સુરક્ષા હટાવીને તેને સ્થાનિક પોલીસના ભરોસે છોડી દેવામાં આવી હતી, જે એક ગંભીર ચૂક સાબિત થઈ. ઘટનાની સાંજે પ્રિયંકા ગાંધીએ રૂમમાં આવીને ધ્રૂજતા અવાજે બોમ્બ વિસ્ફોટ અને પિતાના અવસાનના સમાચાર આપ્યા ત્યારે સોનિયા ગાંધીના પગ નીચેથી જમીન સરકી ગઈ હતી. આઘાતજનક સમાચાર મળતા જ આખો પરિવાર શોકમાં ડૂબી ગયો હતો અને પ્રિયંકાએ અત્યંત મક્કમતાથી પરિસ્થિતિ સંભાળી હતી.
જ્યારે રાજીવ ગાંધીના પાર્થિવ દેહને દિલ્હી લાવવામાં આવ્યા ત્યારે સોનિયા ગાંધીને તેમના નેત્રદાનની છેલ્લી ઈચ્છા યાદ આવી હતી, પરંતુ ડૉક્ટરો દ્વારા આપવામાં આવેલા કડવા જવાબથી તેમનું હૃદય વધુ દ્રવી ગયું હતું. યુએસમાં અભ્યાસ કરી રહેલા રાહુલ ગાંધીને જ્યારે મિત્ર દ્વારા આ દુર્ઘટનાની જાણ કરવામાં આવી, ત્યારે તેમણે તક્ષ ક્ષણે જ કહી દીધું હતું કે પિતા હવે નથી રહ્યા. રાજીવ ગાંધીની હત્યાના આ સંસ્મરણો ભારતીય રાજકારણના એ કાળા અધ્યાયને તાજો કરે છે, જેણે ગાંધી પરિવાર અને દેશને ઊંડો ઘા આપ્યો હતો.
