રાજકોટ શહેરમાં અસામાજિક તત્વોનો ત્રાસ દિવસેને દિવસે વધી રહ્યો છે, જેનું જીવંત ઉદાહરણ એરપોર્ટ ફાટક પાસે બનેલી એક શરમજનક ઘટનામાં જોવા મળ્યું છે. ગુંજનબેન ગણાત્રા નામની મહિલા વેપારી પોતાની મોબાઈલની દુકાન બહાર પરિવાર અને ભાગીદાર અનિકેત ખખ્ખર સાથે દિવાળીની રાત્રે આશરે બે વાગ્યે ફટાકડા ફોડી રહી હતી, તે દરમિયાન એક શખ્સે ત્યાં આવીને અકારણ બોલાચાલી શરૂ કરી હતી. થોડીવાર બાદ તે યુવક વધુ ઉશ્કેરાઈને પરત આવ્યો હતો અને તેણે પોતે પોલીસ ઇન્સ્પેક્ટરનો પુત્ર હોવાનો ખોટો રોફ જમાવીને અભિજીત પરમાર તરીકે પોતાની ઓળખ આપી હતી. આ શખ્સે કાયદાની કોઈ પરવા કર્યા વગર જાહેરમાં દાદાગીરી કરી હતી અને જ્યારે પીડિતોએ આ સમગ્ર કૃત્યનો વીડિયો બનાવવાનો પ્રયાસ કર્યો, ત્યારે મામલો વધુ વણસ્યો હતો અને આરોપીઓ ત્યાંથી ધમકી આપીને જતા રહ્યા હતા.
થોડી જ મિનિટોમાં આ શખ્સો પોતાના સાગરીત કામિલ સંધિ સાથે ફરીથી દુકાન પર ધસી આવ્યા હતા અને આતંક મચાવવાનું શરૂ કર્યું હતું. આરોપીઓએ આવેશમાં આવીને દુકાન પર પથ્થરો તેમજ ફૂટપાથના ભારે બ્લોક ફગાવીને તોડફોડ કરી હતી અને મહિલા વેપારી તથા તેમના ભાગીદાર સાથે હાથાપાઈ કરી ગાળાગાળી કરી હતી. આ હુમલા દરમિયાન પીડિતો દ્વારા મદદ માટે 112 જનરક્ષક હેલ્પલાઇન પર સતત સંપર્ક કરવાનો પ્રયાસ કરવામાં આવ્યો હતો, પરંતુ કોલ સતત વ્યસ્ત આવવાને કારણે સમયસર પોલીસ મદદ મળી શકી નહોતી. એટલું જ નહીં, ઘટનાસ્થળેથી પસાર થયેલી 112 ની પોલીસ વાન પણ શરૂઆતના તબક્કામાં રોકાઈ ન હોવાનો ગંભીર આક્ષેપ પીડિત પરિવાર દ્વારા કરવામાં આવ્યો છે.
આ અરાજકતા બાદ જ્યારે મહિલા વેપારી ફરિયાદ નોંધાવવા માટે પોલીસ સ્ટેશને પહોંચ્યા, ત્યારે પણ આ બેફામ બનેલા તત્વોની ગુનાહિત માનસિકતા અટકી નહોતી અને તેમણે ફરીથી દુકાન પર જઈને પથ્થરમારો કર્યો હોવાની માહિતી મળી હતી. પોલીસ પુત્ર હોવાની ખોટી ઓળખ આપીને સામાન્ય નાગરિકોમાં ભય ફેલાવનાર અને કાયદાને હાથમાં લેનાર આવારા તત્વો સામે પ્રદ્યુમનનગર પોલીસ સ્ટેશનના અધિકારીઓએ સખ્ત વલણ અપનાવ્યું છે. પોલીસે ગુંજનબેન ગણાત્રાની સત્તાવાર ફરિયાદના આધારે મુખ્ય આરોપી અભિજીત પરમાર, કામિલ સંધિ અને અન્ય એક અજાણ્યા શખ્સ વિરુદ્ધ ગુનો નોંધીને સીસીટીવી ફૂટેજના પુરાવાઓ આધારે તમામ આરોપીઓની ધરપકડ કરવાના ચક્રો ગતિમાન કર્યા છે.
