તમિલનાડુના મુખ્યમંત્રી સી. જોસેફ વિજય દ્વારા લેવામાં આવેલા આ જનહિતના નિર્ણયથી લાંબા સમયથી સરકારી નોકરીની તૈયારી કરી રહેલા ઉમેદવારોમાં ખુશીની લહેર દોડી ગઈ છે. રાજ્ય સરકારના સત્તાવાર નિવેદન અનુસાર, અગાઉ યુવાનો દ્વારા વયમર્યાદા વધારવા માટે સતત રજૂઆતો કરવામાં આવી રહી હતી, જેને ધ્યાનમાં રાખીને સરકારે આ મહત્ત્વપૂર્ણ પગલું ભર્યું છે. આ છૂટછાટ હાલના પ્રવર્તમાન નિયમો અને છૂટછાટો ઉપરાંત વધારાની રહેશે, જે આગામી પાંચ વર્ષ સુધી સમગ્ર રાજ્યમાં અમલમાં રહેશે.
આ સુધારેલા નિયમો અંતર્ગત ગ્રુપ-વન (Group-I) સેવાઓ માટે સામાન્ય વર્ગના ઉમેદવારોની ઉંમરની મર્યાદા ૩૨ થી વધારીને ૩૭ વર્ષ કરવામાં આવી છે, જ્યારે આરક્ષિત વર્ગના ઉમેદવારો માટે તે ૩૭ થી વધીને ૪૨ વર્ષ થઈ છે. આ ઉપરાંત, દિવ્યાંગ ઉમેદવારો માટે પણ વયમર્યાદામાં મોટો વધારો કરાયો છે, જેમાં સામાન્ય વર્ગના દિવ્યાંગો માટે મર્યાદા ૪૨ થી ૪૭ વર્ષ અને આરક્ષિત વર્ગ માટે ૪૭ થી ૫૨ વર્ષ સુધીની કરવામાં આવી છે જેથી સમાજના દરેક વર્ગના પ્રતિભાશાળી યુવાનોને સમાન તક મળી રહે.
ગ્રુપ-ટૂ (Group-II) અને ગ્રુપ-ટૂ-એ (Group-II-A) સેવાઓની વાત કરીએ તો, આરક્ષિત વર્ગના ઉમેદવારો માટે અગાઉની જેમ જ કોઈ જ મહત્તમ વયમર્યાદા રાખવામાં આવી નથી. જ્યારે સામાન્ય વર્ગના ઉમેદવારો માટે આ મર્યાદા ૩૦ થી વધારીને ૩૫ વર્ષ કરવામાં આવી છે અને સામાન્ય વર્ગના દિવ્યાંગ ઉમેદવારો માટે તે ૪૦ થી વધારીને ૪૫ વર્ષ કરાઈ છે. સરકારના આ પ્રગતિશીલ નિર્ણયથી કોવિડ કે અન્ય કારણોસર વયમર્યાદા વટાવી ચૂકેલા હજારો યુવાનોને સરકારી સેવામાં જોડાવાનું પોતાનું સ્વપ્ન સાકાર કરવાની નવી તક મળશે.
