તાજેતરમાં ઉત્તર પ્રદેશ, બિહાર, કર્ણાટક અને મહારાષ્ટ્ર સહિતના રાજ્યોમાં યોજાયેલી 28 બેઠકોની 2026ની વિધાન પરિષદ એટલે કે એમએલસી ચૂંટણીના પરિણામો સામે આવી ગયા છે. આ ચૂંટણીમાં ભાજપે શાનદાર પ્રદર્શન કરીને 13 બેઠકો પર કબજો મેળવ્યો છે, જ્યારે સમાજવાદી પાર્ટીએ 5 બેઠકો અને એનસીપીએ 2 બેઠકો જીતી છે. આ ઉપરાંત કોંગ્રેસ, જેડીયુ, જેડીએસ, આરજેડી અને શિવસેનાને 1-1 બેઠક મળી છે તેમજ કેટલાક અપક્ષ ઉમેદવારો પણ જીત્યા છે. આ પરિણામો આવ્યા બાદ સામાન્ય લોકોમાં એમએલસીની ચૂંટણી પ્રક્રિયા અને તેના મતદાન અંગે ભારે ઉત્સુકતા જોવા મળી રહી છે, કારણ કે આ ચૂંટણી લોકસભા કે વિધાનસભા ચૂંટણી કરતા તદ્દન અલગ રીતે યોજાય છે.
બંધારણના આર્ટિકલ 171 મુજબ, એમએલસી ચૂંટણીમાં સામાન્ય જનતા સીધો મત આપી શકતી નથી. આ ચૂંટણીમાં કુલ 5 અલગ અલગ માધ્યમોથી સભ્યોની પસંદગી થાય છે. જેમાં સ્થાનિક સંસ્થાઓ જેવી કે નગરપાલિકાઓના પ્રતિનિધિઓ દ્વારા આશરે એક તૃતીયાંશ સભ્યો ચૂંટાય છે. આ ઉપરાંત ઓછામાં ઓછા 3 વર્ષ પહેલાં સ્નાતક થયેલા અને નોંધાયેલા મતદારો દ્વારા ગ્રેજ્યુએટ્સ મતવિસ્તારમાંથી અને લાયકાત ધરાવતા શિક્ષકો દ્વારા ટીચર્સ મતવિસ્તારમાંથી સભ્યો ચૂંટાય છે. વળી, રાજ્યની વિધાનસભાના ધારાસભ્યો પણ આશરે એક તૃતીયાંશ સભ્યોને ચૂંટે છે, જ્યારે બાકીના સભ્યોની નિમણૂક રાજ્યપાલ દ્વારા સાહિત્ય, વિજ્ઞાન, કલા અથવા સમાજસેવા જેવા ક્ષેત્રોના અનુભવના આધારે કરવામાં આવે છે.
દેશના માત્ર 6 જ રાજ્યોમાં વિધાન પરિષદ અસ્તિત્વમાં છે, જેમાં આંધ્ર પ્રદેશ, બિહાર, કર્ણાટક, મહારાષ્ટ્ર, તેલંગાણા અને ઉત્તર પ્રદેશનો સમાવેશ થાય છે. એમએલસી પાસે કાયદો બનાવવામાં ચર્ચા કરવા, સરકારે સવાલો પૂછવા અને પ્રશ્નો ઉઠાવવાની સત્તા હોય છે, પરંતુ નાણાકીય કે સામાન્ય બિલના મામલે વિધાનસભાની સરખામણીમાં તેમની શક્તિઓ મર્યાદિત હોય છે. સામાન્ય ચૂંટણીમાં મતદારો સીધા પોતાના ધારાસભ્યને પસંદ કરે છે, જ્યારે એમએલસી ચૂંટણીમાં સિંગલ ટ્રાન્સફરેબલ વોટ સિસ્ટમ અને વિવિધ કેટેગરીના મતદારોની વિશેષ પદ્ધતિ દ્વારા પ્રતિનિધિઓ નક્કી થાય છે.
