યુરોપિયન સેન્ટ્રલ બેંક (ECB) ના વડા ક્રિસ્ટીન લગાર્ડે એ પોતાના નિર્ધારિત સમય કરતા વહેલા પદ છોડવાની જાહેરાત કરીને સમગ્ર યુરોપના નાણાકીય જગતમાં હલચલ મચાવી દીધી છે. મૂળ કાર્યકાળ પૂરો થવામાં હજુ સમય બાકી હતો છતાં તેમણે 07 ફેબ્રુઆરી, 2027ના રોજ રાજીનામું આપવાનો નિર્ણય કર્યો છે. તેમના આ પગલાથી લાંબા સમયથી ચાલી રહેલી અટકળોનો અંત આવ્યો છે અને સાથે જ EU નેતાઓને ફ્રાન્સમાં આગામી સમયમાં યોજાનારી રાષ્ટ્રપતિની ચૂંટણી પહેલા જ નવા ઉત્તરાધિકારીની નિમણૂક કરવાની તક મળી ગઈ છે. હાલના દિવસોમાં યુરોપ ઊંચા એનર્જી કોસ્ટ, વધતી જતી મોંઘવારી અને અમેરિકા તથા ચીન સામે સ્પર્ધામાં ટકી રહેવાના પડકારોનો સામનો કરી રહ્યું છે, ત્યારે આ નેતૃત્વ પરિવર્તન ખૂબ જ મહત્વનું સાબિત થશે.
વર્ષ 2019માં કમાન સંભાળનાર લગાર્ડેના કાર્યકાળ દરમિયાન કોરોના મહામારી અને રશિયા-યુક્રેન યુદ્ધ જેવા મોટા વૈશ્વિક સંકટો સામે આવ્યા હતા, જેના કારણે એનર્જીના ભાવ અને મોંઘવારી બેકાબૂ બન્યા હતા. આ સ્થિતિને પહોંચી વળવા માટે બેંકે કટોકટીના સમયમાં બોન્ડ બાઈંગ પ્રોગ્રામ ચલાવ્યા હતા અને બાદમાં મોંઘવારી નિયંત્રણમાં લાવવા માટે વ્યાજદરમાં વધારો કર્યો હતો. જો કે, ઇરાન સાથેના તણાવને કારણે ઓઇલના ભાવ વધતા ફરીથી મોંઘવારીનો ડર ઊભો થયો છે, જ્યારે બોન્ડ યીલ્ડ વધવાથી દેશો, કંપનીઓ અને સામાન્ય લોકો માટે લોન લેવાનું મોંઘું બન્યું છે. ખાસ કરીને ફ્રાન્સની આર્થિક સ્થિતિ ચિંતાનો વિષય બની છે. આગામી સમયમાં ક્લાસ નોટ અને પાબ્લો હર્નાન્ડેઝ ડે કોસ જેવા મોટા નામ રેસમાં છે, જેઓ આ મુશ્કેલ આર્થિક સંતુલન વચ્ચે બેંકની આગેવાની સંભાળી શકે છે.
લગાર્ડેની શૈલી તમામ નીતિ ઘડનારાઓ વચ્ચે સર્વાનુમતે સહમતિ સાધવાની રહી છે, પરંતુ નવા નેતા માટે આટલી સરળડાઈ નહીં રહે કારણ કે બજાર અને નીતિ ઘડનારાઓ વચ્ચે સંકલન જાળવવું મોટો પડકાર હશે. નિષ્ણાતોના મતે, નવા પ્રમુખે મોંઘવારીને ડામવાની સાથે સાથે આર્થિક વૃદ્ધિ અને રાજકીય રીતે વહેંચાયેલા યુરોપમાં વિશ્વાસ ટકાવી રાખવો પડશે. ભલે વ્યાજદરનો નિર્ણય ગવર્નિંગ કાઉન્સિલ દ્વારા સામૂહિક રીતે લેવાતો હોય, પરંતુ પ્રમુખની ભૂમિકા બજારને દિશા આપવામાં સૌથી મહત્વની રહે છે. હવે જોવાનું એ રહેશે કે લગાર્ડેની વિદાય બાદ યુરોપિયન અર્થતંત્ર આ નવા વળાંક પર કેવી પ્રતિક્રિયા આપે છે અને નવા વડા આ આર્થિક જાદુગરીને કેવી રીતે પાર પાડે છે.
