ગુજરાતના રેલવે પ્રવાસીઓ માટે ખુશખબર સામે આવી છે, જેમાં આગામી 30 ઑક્ટોબર 2026ના રોજ વડાપ્રધાન નરેન્દ્ર મોદી વીડિયો કોન્ફરન્સિંગના માધ્યમથી બે નવી મહત્વની ટ્રેન સેવાઓને લીલી ઝંડી બતાવીને રવાના કરશે. આ ભવ્ય કાર્યક્રમ અંતર્ગત સાબરમતી સ્ટેશન પર રાજ્ય સરકારના મંત્રીઓ, સાંસદ, ધારાસભ્ય અને અમદાવાદના મેયર ઉપસ્થિત રહેશે, જ્યારે બેચરાજી સ્ટેશન ખાતે પણ સ્થાનિક સાંસદ અને ધારાસભ્ય સહિતના મહાનુભાવો હાજર રહીને આ સેવાનો પ્રારંભ કરાવશે. આ નવી રેલ સેવાઓ શરૂ થવાથી પ્રવાસન, સ્થાનિક વેપાર, ઉદ્યોગો અને સામાજિક-આર્થિક વિકાસને નવી ગતિ મળશે તેમજ દૈનિક મુસાફરો અને શ્રદ્ધાળુઓની વર્ષો જૂની માંગણી સંતોષાઈ છે.
અમદાવાદ મંડળના ડીઆરએમના જણાવ્યા અનુસાર, દૈનિક ચાલનારી નવી ટ્રેન નંબર 12205 સાબરમતીથી સવારે 05:20 વાગ્યે ઊપડીને બીજા દિવસે સવારે 06:30 વાગ્યે વારાણસી પહોંચશે, જ્યારે પરત ફરતી ટ્રેન નંબર 12206 વારાણસીથી સાંજે 17:30 વાગ્યે ઊપડીને બીજા દિવસે રાત્રે 20:15 વાગ્યે સાબરમતી પરત આવશે. આ એક્સપ્રેસ ટ્રેન મહેસાણા, પાલનપુર, આબુરોડ, અજમેર, જયપુર, આગ્રા જંક્શન, ટુંડલા અને સૂબેદારગંજ જેવા મોટાં સ્ટેશનો પર રોકાશે. બીજી તરફ મહેસાણા-બેચરાજી-સાબરમતી મેમુ ટ્રેન પણ સવાર અને સાંજની બે બેઠકોમાં દોડશે, જે ચાંદખેડા, કલોલ, કડી અને બેચરાજી જેવા રૂટ પર દોડીને ઉત્તર ગુજરાતના દૈનિક મુસાફરો, વિદ્યાર્થીઓ અને વેપારીઓને મોટી રાહત આપશે.
આ બંને નવી ટ્રેનો શરૂ થવાથી ખાસ કરીને કાશી વિશ્વનાથ મહાદેવના દર્શને જતા શ્રદ્ધાળુઓ માટે ઉત્તર પ્રદેશ અને રાજસ્થાનનો પ્રવાસ ખૂબ જ સરળ અને આરામદાયક બની જશે. તેમજ બહુચરાજી જતા દર્શનાર્થીઓ માટે પણ ઉત્તમ પરિવહન સુવિધા ઉપલબ્ધ થશે. ભારતીય રેલવે સતત મુસાફર-કેન્દ્રીત પરિવહન વ્યવસ્થા તરફ આગળ વધી રહી છે ત્યારે આ ટ્રેનોથી ગુજરાતના પ્રવાસીઓને સીધો ફાયદો થશે અને સમયની સાથે સાથે મુસાફરી પણ વધુ સુરક્ષિત બનશે.
