વર્ષ 2023માં પ્રાઇમ મિનિસ્ટર નરેન્દ્ર મોદીના હસ્તે શિલાન્યાસ પામેલા વારાણસીના આ નવા ક્રિકેટ સ્ટેડિયમનું નિર્માણ કાર્ય હવે પૂરી થવાની આરે છે. આશરે 450 કરોડ રૂપિયાના ખર્ચે અને 31 એકરની વિશાળ જગ્યામાં ફેલાયેલા આ સ્ટેડિયમનું ડિઝાઇનિંગ વારાણસીની સાંસ્કૃતિક ઓળખને ધ્યાનમાં રાખીને કરવામાં આવ્યું છે. અહીંના ફ્લડલાઇટ્સ ભગવાન શિવના ત્રિશૂળના આકારના છે, સ્ટેડિયમની છત અર્ધચંદ્રાકાર એટલે કે ક્રેસન્ટ શેપની છે અને મીડિયા સેન્ટરને ડમરુનો આકાર આપવામાં આવ્યો છે, જે તેને દુનિયાભરના સ્ટેડિયમોથી સાવ અલગ અને અદભુત બનાવે છે. શરૂઆતમાં આ સ્ટેડિયમની બેઠક ક્ષમતા 30,000 દર્શકોની છે, જેને ભવિષ્યમાં વધારીને 40,000 સુધી લઈ જઈ શકાશે. આ ઉપરાંત, અહીં હાઇ-ટેક ડ્રેનેજ સિસ્ટમ પણ નંખાઈ છે જેથી વરસાદ બંધ થયાના માત્ર 30 મિનિટની અંદર જ મેદાન રમવા માટે તૈયાર થઈ જાય.
આ સ્ટેડિયમમાં ક્રિકેટની ગાડી સત્તાવાર રીતે શરૂ થાય તે પહેલાં બીસીસીઆઈની મંજૂરી અને પિચનું ટેસ્ટિંગ ખૂબ જ મહત્વનું છે. યુપીસીએ એટલે કે ઉત્તર પ્રદેશ ક્રિકેટ એસોસિએશને પિચની ગુણવત્તા ચકાસવા માટે અહીં અંડર-19 મેચોનું આયોજન કર્યું છે. શેડ્યૂલ મુજબ ડિસેમ્બર 3 થી 6 દરમિયાન ઉત્તર પ્રદેશ અને પુડુચેરી વચ્ચે તેમજ ડિસેમ્બર 11 થી 14 દરમિયાન છત્તીસગઢ સામે મેચો રમાશે. આ મેચો શરૂ થાય તે પહેલાં બીસીસીઆઈ, લખનૌ સુપર જાયન્ટ્સ (એલએસજી) અને બ્રોડકાસ્ટ ટીમના અધિકારીઓએ સ્ટેડિયમની મુલાકાત લઈને જાતતપાસ પણ કરી લીધી છે. લખનૌના એકાના સ્ટેડિયમ અને કાનપુરના ગ્રીન પાર્ક પછી ઉત્તર પ્રદેશમાં આ ત્રીજું એવું મુખ્ય સ્થળ બનશે જ્યાં મોટા સ્તરની ક્રિકેટ મેચો રમી શકાશે.
આ સ્ટેડિયમ માત્ર ડોમેસ્ટિક ક્રિકેટ પૂરતું મર્યાદિત નહીં રહે, પરંતુ ભવિષ્યમાં આ ક્ષેત્રના ક્રિકેટ ફેન્સ માટે મોટા ટૂર્નામેન્ટ્સના દરવાજા પણ ખૂલી જશે. 2027માં આ સ્ટેડિયમમાં આઈપીએલ એટલે કે IPLની મેચો શિફ્ટ થવાની પ્રબળ શક્યતાઓ વ્યક્ત કરવામાં આવી રહી છે, સાથે જ વુમન્સ પ્રીમિયર લીગ (ડબલ્યુપીએલ) માટે પણ તેના પર નજર છે. પૂર્વ યુપીના દર્શકોને હવે ઘરઆંગણે જ ઇન્ટરનેશનલ લેવલની સુવિધાઓ અને મોટી મેચોનો રોમાંચ માણવા મળશે. હાલ તો અંડર-19 મેચોના સફળ આયોજન પર બધાની નજર છે, અને જો પિચ તથા ગ્રાઉન્ડનું ટેસ્ટિંગ સફળ રહેશે તો વારાણસી ટૂંક સમયમાં જ ભારતીય ક્રિકેટના નકશા પર એક મોટું સેન્ટર બનીને ઉભરશે.
