ટેક જાયન્ટ ગુગલની પેરેન્ટ કંપની આલ્ફાબેટ દ્વારા તાજેતરમાં 28 ઓક્ટોબરના રોજ વર્ષ 2026ના ત્રીજા ક્વાર્ટરના પરિણામો જાહેર કરવામાં આવ્યા છે. કંપનીના વડા સુન્દર પિચાઈએ સોશિયલ મીડિયા પ્લેટફોર્મ એક્સ પર ખુશી વ્યક્ત કરતા જણાવ્યું હતું કે ગુગલ હવે વાર્ષિક હાફ ટ્રીલિયન ડોલરની રેવન્યુ રન રેટ પર પહોંચી ગયું છે અને આલ્ફાબેટની રેવન્યુમાં 25 ટકાનો જબરદસ્ત વધારો થયો છે. ગુગલની આ સફળતા જોઈને દિગ્ગજ ઉદ્યોગપતિ એલોન મસ્કે પણ ચોંકીને વાઉ જેવી પ્રતિક્રિયા આપી હતી. જોકે, આ કમાણીના આંકડા ભલે ચમકતા હોય પરંતુ વોલ સ્ટ્રીટ એટલે કે શેર બજારના દિગ્ગજો આ રિપોર્ટથી બિલકુલ ખુશ નથી દેખાઈ રહ્યા.
પરિણામો સામે આવ્યાની થોડીવારમાં જ આલ્ફાબેટના શેરમાં અંદાજે 10 ટકાનો મોટો ઘટાડો નોંધાયો હતો, કારણ કે કંપની પ્રોફિટના અંદાજને પહોંચી વળવામાં નિષ્ફળ રહી હતી. ક્વાર્ટર દરમિયાન કંપનીનો નેટ ઇન્કમ ઘટીને 26.17 અબજ ડોલર એટલે કે પ્રતિ શેર 2.12 ડોલર રહી ગઈ છે, જે ગત વર્ષે સમાન સમયગાળામાં 34.98 અબજ ડોલર હતી. આ ઉપરાંત, કંપનીનું કેપિટલ એક્સપેન્ડિચર વધીને 51.36 અબજ ડોલર પર પહોંચી ગયું છે અને નેગેટિવ ફ્રી કેશ ફ્લો 9.07 અબજ ડોલર રહ્યો છે. ખાસ કરીને એઆઈ ઇન્ફ્રાસ્ટ્રક્ચર પાછળ 50 અબજ ડોલરથી વધુનો ખર્ચ થવાને કારણે અને કંપનીનું લાંબા ગાળાનું દેવું વધીને 125.1 અબજ ડોલર પર પહોંચી જવાથી રોકાણકારોમાં કેશ બર્નને લઈને ડર પેદા થયો છે.
બીજી બાજુ, આ નબળા પાસાઓ વચ્ચે ગુગલના કેટલાક બિઝનેસ સેગમેન્ટ્સ શાનદાર પ્રદર્શન કરી રહ્યા છે. કંપનીનું ક્લાઉડ રેવન્યુ 103 ટકાથી વધુ ઉછળીને 30.7 અબજ ડોલર થઈ ગયું છે, જ્યારે સર્ચ રેવન્યુ 12 ટકા વધીને 63.35 અબજ ડોલર પર પહોંચી છે. આ ઉપરાંત, જેિમી એપ અત્યારે વન બિલિયન યૂઝર્સ સાથે ગુગલના ઇતિહાસમાં સૌથી ઝડપથી આગળ વધતું પ્રોડક્ટ બન્યું છે અને યુટ્યુબ મ્યુઝિક તથા પ્રીમિયમ સબસ્ક્રાઇબર્સનો આંકડો પણ 150 મિલિયનને પાર થઈ ગયો છે. ઓટોનોમસ ડ્રાઇવિંગ ક્ષેત્રે વેમો પણ સારી રફતાર પકડી રહી છે અને દુનિયાભરમાં પોતાના વ્યાપનો વિસ્તાર કરી રહી છે, પરંતુ હાલ તો વોલ સ્ટ્રીટનું ધ્યાન કંપનીના વધતા દેવા અને ઘટી રહેલા પ્રોફિટ પર જ કેન્દ્રિત છે.
