બોલિવૂડ અભિનેતા રણબીર કપૂરની આગામી પૌરાણિક મહાકાવ્ય પર આધારિત ફિલ્મ રામાયણ ભાગ 1 ને લઈને દર્શકોમાં અલગ જ ઉત્સાહ અને ક્રેઝ જોવા મળી રહ્યો છે. આ ફિલ્મનું નિર્માણ અને તેની સ્ટારકાસ્ટ એટલી ચર્ચામાં છે કે બોક્સઓફિસ પર તેનું પ્રભુત્વ અત્યારથી જ સ્પષ્ટ દેખાઈ રહ્યું છે. આ જ કારણ છે કે દિવાળીના સમયગાળાની આ આસપાસ સિનેમાઘરોમાં મોટો ફેરફાર જોવા મળી રહ્યો છે અને અન્ય ફિલ્મોના મેકર્સ પણ હવે પોતાની રણનીતિ બદલવા મજબૂર બન્યા છે.
મૂળ 6 નવેમ્બરે વિશ્વભરમાં રિલીઝ થનારી જાપાનીઝ ફ્રેન્ચાઇઝી ફિલ્મ ગોડઝિલા માઈનસ ઝીરોને ભારતમાં તેની રિલીઝ મુલતવી રાખવાની ફરજ પડી છે. અહેવાલો મુજબ, રામાયણના ભારે ક્રેઝના કારણે ભારતભરની મોટાભાગની પ્રીમિયમ IMAX સ્ક્રીનો પર આ પૌરાણિક ફિલ્મે અગાઉથી જ કબજો જમાવી લીધો છે. પરિણામે, ગોડઝિલા ફિલ્મને પૂરતી સંખ્યામાં IMAX સ્ક્રીન ફાળવી શકાય તેમ ન હોવાને કારણે નિર્માતાઓએ ભારતીય બજારમાં ફિલ્મની રિલીઝ ડેટ આગળ ધકેલવાનો વ્યવહારુ નિર્ણય લીધો છે.
ભારતમાં ગોડઝિલાના વિતરણનું કામ સંભાળી રહેલી પીવીઆર આઈનોક્સ કંપની દ્વારા હાલમાં નવી રિલીઝ તારીખ નક્કી કરવા માટે ગંભીર ચર્ચાઓ ચાલી રહી છે, જેથી આ શાનદાર ફિલ્મને દેશના દર્શકો સમક્ષ યોગ્ય પ્લેટફોર્મ પર રજૂ કરી શકાય. જોકે, હજુ સુધી કંપની દ્વારા કોઈ સત્તાવાર નવી તારીખ જાહેર કરવામાં આવી નથી, પરંતુ ટૂંક સમયમાં જ નવી તારીખની જાહેરાત થાય તેવી પૂરી શક્યતા છે.
