ઉત્તર પ્રદેશના ગ્રેટર નોઈડામાં પંજાબ નેશનલ બેંકની આઈછર ગામની શાખામાં મોટું કૌભાંડ બહાર આવતા ખળભળાટ મચી ગયો છે. અહીં ઓછામાં ઓછા 16 જેટલા ખાતાધારકો, જેમાં મોટાભાગના ખેડૂતો સામેલ છે, તેમણે બેંકના કર્મચારીઓ પર વગર મંજૂરીએ ફિક્સ્ડ ડિપોઝિટ અને ખાતામાંથી અંદાજે 35 કરોડ રૂપિયા સેરવી લેવાનો ગંભીર આરોપ મૂક્યો છે. આ ચોંકાવનારી ઘટના સામે આવ્યા બાદ ગ્રાહકોમાં ભારે રોષ ફેલાયો છે અને મંગળવારથી બેંક શાખા બંધ રહેતા લોકોએ બહાર એકઠા થઈને જોરદાર દેખાવો કર્યા હતા અને પોતાના નાણાં પાછા મેળવવાની માંગ કરી હતી. મામલો ગંભીર બનતા બેંક મેનેજર સહિત 5 કર્મચારીઓને સસ્પેન્ડ કરી દેવામાં આવ્યા છે અને બેંકે આંતરિક તપાસ શરૂ કરી છે.
આ કેસમાં ભોગ બનનારા ગ્રાહકોએ સેક્ટર બેટા 2 પોલીસ સ્ટેશનમાં પહોંચીને ફરિયાદ નોંધાવી હતી, જેના આધારે પોલીસે ભારતીય ન્યાય સંહિતાની કલમ 316(5) હેઠળ એફઆઈઆર નોંધી છે. સુરજપુરના વિરૂંડી ચક્રસેનપુર ગામના રહેવાસી શ્રીચંદે આરોપ મૂક્યો હતો કે તેમના ખાતા સાથે જોડાયેલી એફડીમાંથી 1.16 કરોડ રૂપિયા ગાયબ થઈ ગયા છે. આ સિવાય અન્ય ગ્રાહકોમાં વિનીત ભાટીના ખાતામાંથી 25 લાખ, ગૌતમ અને તેના પરિવારના ખાતામાંથી મોટી રકમ તથા સંજય, હનીફ, અમિચંદ, વિજય પાલ અને સુભાષ જેવા અનેક લોકોના ખાતામાંથી લાખો અને કરોડો રૂપિયા ગાયબ થયા હોવાનું સામે આવ્યું છે. ગ્રાહકોનો આરોપ છે કે તેમની જાણ વગર કે કોઈ પણ ઓટીપી, મેસેજ એલર્ટ કે ઉપાડ ફોર્મ ભર્યા વગર જ એફડી પ્રી-મેચ્યોર બંધ કરીને નાણાં અન્ય ખાતાઓમાં ટ્રાન્સફર કરી દેવાયા હતા અથવા પાસબુકમાં ખોટી એન્ટ્રીઓ કરાઈ હતી.
આ સમગ્ર મામલે એડિશનલ ડીસીપી સંતોષ કુમારે જણાવ્યું છે કે એક એસીપીને આ તપાસની જવાબદારી સોંપવામાં આવી છે અને પોલીસ એફઆઈઆરની તમામ ફરિયાદોની ઝીણવટભરી તપાસ કરી રહી છે. બીજી તરફ, ભારતીય કિસાન યુનિયનનો દાવો છે કે આ કૌભાંડનો આંકડો 35 કરોડથી વધીને 130 થી 150 કરોડ સુધી પહોંચી શકે છે અને જો निष्पक्ष તપાસ નહીં થાય તો ઉગ્ર આંદોલન કરવાની ચીમકી પણ ઉચ્ચારવામાં આવી છે. હાલ તો પોલીસે આ મામલે તપાસ તેજ કરી છે અને ગ્રાહકો પોતાની મહેનતની કમાણી પાછી મેળવવા માટે બેંક અને પોલીસના ધક્કા ખાવા મજબૂર બન્યા છે.
