કેરળના પબ્લિક વર્ક્સ ડિપાર્ટમેન્ટ મંત્રી પી. કે. બશીરે ગુરુવારે રાજ્યની એસેમ્બલીમાં જણાવ્યું કે, 2 દશકા પહેલાંના એક રોડ પ્રોજેક્ટમાં ભ્રષ્ટાચારના આક્ષેપો મામલે વિજિલન્સ એન્ડ એન્ટી કરપ્શન બ્યુરો દ્વારા પ્રિલિમિનરી ઇન્ક્વાયરી ચાલી રહી છે. ભાજપના ધારાસભ્યો દ્વારા પૂછવામાં આવેલા સવાલોના જવાબ આપતા મંત્રીએ સ્પષ્ટ કર્યું કે હાલ આ તપાસનો રિપોર્ટ હજી સુધી ઉપલબ્ધ થયો નથી. આ સમગ્ર મામલો વર્ષ 2006નો છે જ્યારે ચીફ ઇલેક્શન કમિશનર (CEC) જ્ઞાનેશ કુમાર પબ્લિક વર્ક્સ ડિપાર્ટમેન્ટના સેક્રેટરી તરીકે સેવા આપી રહ્યા હતા.
વર્ષ 2006માં કેરળ સ્ટેટ ટ્રાન્સપોર્ટ પ્રોજેક્ટ અંતર્ગત વર્લ્ડ બેંકની મદદથી 215 કરોડના ખર્ચે અંગમાલીથી તિરુવનંતપુરમ સુધીના એમસી રોડના પુનઃનિર્માણનું કામ હાથ ધરવામાં આવ્યું હતું. આ પ્રોજેક્ટ મલેશિયાની કંપની અને ભગીરથા એન્જિનિયરિંગના જોઈન્ટ વેન્ચર 'પાટી-બેલ'ને સોંપવામાં આવ્યો હતો, જેમાં કામ મલેશિયન કંપની દ્વારા કરવામાં આવ્યું હતું. મંત્રીએ ગૃહમાં માહિતી આપી હતી કે 2006માં વિજિલન્સ અને એન્ટી કરપ્શન બ્યુરો દ્વારા કરવામાં આવેલી તપાસમાં કેટલીક અનિયમિતતાઓ સામે આવ્યા બાદ આ નવી પ્રિલિમિનરી ઇન્ક્વાયરીના આદેશ આપવામાં આવ્યા છે, કારણ કે અધિકારીઓની કથિત ગેરરીતિઓના કારણે સરકારને 700 કરોડનું મોટું નુકસાન થયું હતું.
આ પ્રોજેક્ટ દરમિયાન કામકાજ સામે મલેશિયન કંપનીના પ્રોજેક્ટ એન્જિનિયર લી સી બીને અનેક ફરિયાદો ઉઠાવી હતી અને બાદમાં તેઓ મલેશિયા પરત ફર્યા હતા જ્યાં તેમણે આત્મહત્યા કરી લીધી હતી. હાલ વિધાનસભામાં સવાલોના જવાબ દરમિયાન આ ગંભીર મુદ્દો ચર્ચાના કેન્દ્રમાં આવ્યો છે ત્યારે વિજિલન્સ તપાસનો રિપોર્ટ બહાર આવ્યા બાદ જ આ કેસમાં આગળના ખુલાસા થશે અને જવાબદાર અધિકારીઓ સામે કઈ કાર્યવાહી થાય છે તે સ્પષ્ટ થશે.
