ચેન્નાઈમાં તમિલનાડુની રાજનીતિ ગરમાઈ છે અને ડીએમકે નેતા એમ કે સ્ટાલિને ગુરુવારે TVK સરકાર સામે મોરચો ખોલતા મુખ્યમંત્રી સી જોસેફ વિજય પર આકરા પ્રહાર કર્યા છે. સ્ટાલિને આરોપ લગાવ્યો છે કે રાજ્યમાં કાયદો અને વ્યવસ્થાની સ્થિતિ સતત બગડી રહી છે અને સરકાર માત્ર પબ્લિક રિલેશન્સ, રોડ શો તથા રેડના સહારે લોકોનું ધ્યાન ભટકાવવાનો પ્રયાસ કરી રહી છે. તેમણે TVK સરકારને એક એવી મશીન ગણાવી જે ભ્રષ્ટ તત્વોને બચાવવાનું કામ કરી રહી છે અને પૂર્વ ડીએમકે મંત્રીઓને ટાર્ગેટ કરીને બદલાની રાજનીતિ રમાઈ રહી છે.
આ નિવેદન એવા સમયે આવ્યું છે જ્યારે ડીએમકેના વરિષ્ઠ નેતા અને પૂર્વ મંત્રી કે એન નેહરૂ તેમજ તેમના પરિવારજનોના ઠેકાણાઓ પર સતત રેડ ચાલી રહી છે. સ્ટાલિને દાવો કર્યો છે કે આ બધી કાર્યવાહી માત્ર તિરૂચી ઈસ્ટ બાયપોલને ધ્યાનમાં રાખીને સોશિયલ મીડિયા પર રીલ્સ બનાવવા અને સ્ટેજ પર ડ્રામેટિક ડાયલોગ બોલવા માટે કરવામાં આવી રહી છે. તેમણે સ્પષ્ટ શબ્દોમાં ચેતવણી આપી હતી કે આવી છાપેમારીથી ડીએમકેનો સામાન્ય કાર્યકર પણ ડરવાનો નથી અને કોર્ટ તેમજ જનતાની અદાલતમાં આ રાજકીય બદલો નિષ્ફળ સાબિત થશે.
વધુમાં સ્ટાલિને જણાવ્યું હતું કે રાજ્યમાં મોંઘવારી ચરમસીમાએ છે, વહીવટી તંત્ર સ્થિર થઈ ગયું છે અને કાયદો તથા વ્યવસ્થાની સ્થિતિ પર દેશભરમાં ચર્ચા થઈ રહી છે ત્યારે સરકાર પોતાની નિષ્ફળતાઓ છુપાવવા માટે આવા કીમિયા અપનાવી રહી છે. ડીએમકે નેતાએ હુંકાર ભર્યો હતો કે સરકાર ગમે તેટલા પ્રયાસો કરી લે પરંતુ વિરોધ અવાજોને દબાવી શકાશે નહીં અને જનતામાં સરકાર પ્રત્યેનો અસંતોષ વધી રહ્યો હોવાથી તેમની પાર્ટી સરકારના ભ્રષ્ટાચાર અને નિષ્ફળતાઓને વધુ આક્રમકતાથી લોકો સામે ઉજાગર કરતી રહેશે.
