ઝોહોના કો-ફાઉન્ડર અને ચીફ સાયન્ટિસ્ટ શ્રીધર વેંબુએ સોશિયલ મીડિયા પ્લેટફોર્મ X પર એક પોસ્ટ કરીને AI ના વધતા પ્રભાવને લઈને ગંભીર ચેતવણી આપી છે. તેમણે સ્પષ્ટ કર્યું છે કે કોમ્પ્યુટર પર થતા કોઈપણ કામ પર હવે મોટું જોખમ તોળાઈ રહ્યું છે, કારણ કે એક હોશિયાર વ્યક્તિ AI ની મદદથી 10 લોકો જેટલી પ્રોડક્ટિવિટી આપી શકે છે. વેંબુના જણાવ્યા મુજબ આ જોખમ હવે વાસ્તવિક બની રહ્યું છે અને તેના કારણે આગામી સમયમાં આર્થિક ક્ષેત્રે મોટો બદલાવ જોવા મળી શકે છે. સોફ્ટવેર એન્જિનિયરિંગ અને ડિજિટલ માર્કેટિંગ જેવા ક્ષેત્રોમાં આ ટેકનોલોજીનો પ્રભાવ સૌથી વધુ જોવા મળશે.
જોકે, વેંબુએ સ્પષ્ટતા કરી છે કે આ ઉત્પાદકતા વધવાનો મતલબ એ નથી કે કોમ્પ્યુટર પર કામ કરનારા 90 ટકા લોકો બેરોજગાર થઈ જશે. સસ્તી સેવાઓ ઉપલબ્ધ થવાને કારણે એવા ઉદ્યોગો પણ આ સેવાઓ ખરીદી શકશે જે અગાઉ આર્થિક મર્યાદાઓને કારણે પ્રોફેશનલ્સને હાયર કરી શકતા નહોતા. આ ફેરફારથી અર્થવ્યવસ્થામાં રીબેલેન્સિંગ થશે, જેનો સામનો કરવો થોડો મુશ્કેલ અને પીડાદાયક સાબિત થઈ શકે છે. આ માત્ર સોફ્ટવેર નોકરીઓ પૂરતું સીમિત નથી, પરંતુ સમગ્ર અર્થવ્યવસ્થા પર તેની અસર પડશે અને આપણે આ હકીકત સ્વીકારીને અગાઉથી જ તૈયારી કરવી પડશે.
આ બદલાવની સીધી અસર કંપનીઓના ઓપરેશન અને ખર્ચ પર પણ પડી રહી છે. વધતા સર્વરના ભાવ અને AI ના ભારે ઉપયોગથી ડેટા સેન્ટર્સનો ખર્ચ 4 ગણો વધી ગયો છે, જેને નિયંત્રિત કરવા માટે ઝોહોએ માર્કેટિંગ બજેટ ઘટાડી દીધું છે અને કર્મચારીઓને આ વર્ષે રેગ્યુલર સેલરી હાઇક આપવી મુશ્કેલ હોવાનું જણાવ્યું છે. કંપનીએ છેલ્લા 18 મહિનામાં નવા કર્મચારીઓની ભરતી અટકાવી દીધી છે, જોકે કંપનીનો પ્રયાસ મોટા પાયે છટણી એટલે કે માસ લેઓફ ટાળવાનો રહેશે. વૈશ્વિક અનિશ્ચિતતા અને ટેકનોલોજીના આ યુગમાં સોફ્ટવેર જોબ્સનું ભવિષ્ય થોડું પડકારજનક જરૂર બન્યું છે.
