ગુજરાતના અબજોપતિ બિઝનેસમેન ગૌતમ અદાણી હવે ભારતીય બજાર ઉપરાંત વૈશ્વિક સ્તરે પણ મોટો પગલાં ભરવાની ફિરાકમાં છે. આ બાબતથી નજીકથી જોડાયેલા સૂત્રોના જણાવ્યા અનુસાર, અદાણી ગ્રુપ યુરોપની પ્રખ્યાત ડચ એનર્જી સ્ટોરેજ કંપની VTTI ને ખરીદવા માટે ગંભીરતાથી વિચારી રહી છે. વર્તમાન સમયમાં વૈશ્વિક સ્તરે સપ્લાય ચેઈનમાં થતા વિક્ષેપોને કારણે ઊર્જા વેપાર માટે આવી સ્ટોરેજ સુવિધાઓનું મહત્વ ખૂબ જ વધી ગયું છે, જેને ધ્યાનમાં રાખીને આ ડીલ અદાણી ગ્રુપ માટે ગેમ-ચેંગર સાબિત થઈ શકે છે.
આ સંભવિત મેગા ડીલની વિગતો મુજબ, રોટરડેમ સ્થિત VTTI કંપનીનું કુલ મૂલ્યાંકન આશરે 3 બિલિયન યુરો એટલે કે ભારતીય ચલણ મુજબ લગભગ 33000 કરોડ રૂપિયા આંકવામાં આવી રહ્યું છે. હાલમાં આ કંપનીમાં ઓસ્ટ્રેલિયન ઇન્ફ્રાસ્ટ્રક્ચર મેનેજર IFM ઇન્વેસ્ટર્સ અને એનર્જી ગ્રુપ વિટોલ પાસે લગભગ 45-45 ટકા હિસ્સો છે, જ્યારે અબુ ધાબી નેશનલ ઓઇલ કંપની એટલે કે ADNOC પાસે બાકીનો 10 ટકા હિસ્સો છે. ચર્ચા એવી પણ છે કે ADNOC પોતાનો આ સંપૂર્ણ હિસ્સો વેચવા માંગે છે અને અન્ય માલિકો પણ પોતાનો હિસ્સો ઘટાડવા અંગે વિચારી રહ્યા છે. જોકે, આ બાબતે હજી પ્રાથમિક સ્તરે ચર્ચાઓ ચાલી રહી છે અને અન્ય બોલી લગાવનારા પણ રેસમાં સામેલ હોવાથી સોદો આખરી ક્યારે થશે તે અંગે હજી કોઈ સ્પષ્ટતા નથી.
અદાણી ગ્રુપના પોર્ટફોલિયોમાં પહેલેથી જ એરપોર્ટ, રસ્તા, ડેટા સેન્ટર, ખાણકામ અને બંદરો જેવી મોટી માળખાગત સંપત્તિઓ સામેલ છે અને ગૌતમ અદાણી વિશ્વના અગ્રણી ધનિકોમાં સ્થાન ધરાવે છે. અગાઉ જૂલાઈ મહિનામાં અદાણી એન્ટરપ્રાઇઝ લિમિટેડે સંસ્થાકીય રોકાણકારો પાસેથી 150 બિલિયન રૂપિયા એકત્ર કર્યા હતા, જેનો ઉપયોગ દેવા ચુકવણી અને મૂડી ખર્ચ માટે થવાનો છે. અગાઉના અમુક કાનૂની પડકારોમાંથી રાહત મેળવ્યા બાદ હવે ગ્રુપે વિદેશી બજારોમાં પોતાના બિઝનેસને વેગ આપવા પર ધ્યાન કેન્દ્રિત કર્યું છે, જેના ભાગરૂપે અગાઉ યુકેના સૌથી મોટા પોર્ટ ઓપરેટરમાં પણ હિસ્સો ખરીદવાની ચર્ચા થઈ ચૂકી છે.
