ઓકલેન્ડમાં રમાનારી ન્યૂઝીલેન્ડ સામેની ચોથી ટી20 મેચ પહેલા ભારતીય બેટર તિલક વર્માએ એક રસપ્રદ ખુલાસો કર્યો છે કે તે પડદા પાછળ પોતાની બોલિંગ પર ખૂબ કામ કરી રહ્યો છે. ભારતીય ટીમ હાલમાં આ પાંચ મેચોની ટી20 શ્રેણીમાં 3-0થી આગળ છે અને ટીમ ઈન્ડિયાની નજર હવે ક્લીન સ્વીપ કરવા પર છે, જ્યારે કિવી ટીમ પોતાના હોમ ફેન્સ સામે સાખ બચાવવા મેદાને ઉતરશે. આગામી સમયમાં સાઉથ આફ્રિકામાં યોજાનાર ૨૦૨૭ના ICC ક્રિકેટ વર્લ્ડ કપને ધ્યાનમાં રાખીને તિલક તેની રાઈટ-આર્મ સ્પિન બોલિંગને વધુ ધારદાર બનાવી રહ્યો છે અને જરૂર પડ્યે ટીમ માટે લિમિટેડ ઓવર્સ ક્રિકેટમાં ઓવર્સ નાખવા પૂરી રીતે તૈયાર છે.
આ અંગે વાત કરતા તિલકે જણાવ્યું કે ટીમ મેનેજમેન્ટ સાથે આ બાબતે ચર્ચા થઈ છે અને તેણે પોતાની બોલિંગ પર ઘણી મહેનત પણ કરી છે. હાલમાં ટીમમાં નમાન ધિર શાનદાર બોલિંગ કરી રહ્યો છે, જેણે 5 ઇનિંગ્સમાં 5 વિકેટ ઝડપી છે અને શ્રેષ્ઠ પ્રદર્શન 3/31 રહ્યું છે. નમાન સારું પ્રદર્શન કરી રહ્યો હોવાથી તિલકે કહ્યું કે હાલમાં બોલિંગ છીનવવાની કોઈ જરૂર નથી, પરંતુ જ્યારે પણ તક મળશે ત્યારે તે ચોક્કસપણે બોલિંગ કરશે. ઉલ્લેખનીય છે કે તિલકે તેની ટી20 કારકિર્દીમાં અત્યાર સુધી 12 વિકેટ ઝડપી છે, જેમાં ટી20 આંતરરાષ્ટ્રીયમાં તેની 5 વિકેટ સામેલ છે અને તેનો ઇકોનોમી રેટ 6.09 નો શાનદાર રહ્યો છે.
બેટિંગ અને બોલિંગ ઉપરાંત મેદાન પર પોતાની શાનદાર ફિલ્ડિંગ અને કેચ માટે જાણીતા તિલકે કહ્યું કે તે ક્યારેય ફિલ્ડિંગને બોજ નથી માનતો પરંતુ તેની પૂરેપૂરી મજા માણે છે. વિદેશી પરિસ્થિતિઓમાં જ્યારે પવન અને ઠંડીમાં હવામાન મુશ્કેલ હોય ત્યારે પણ તે ફિલ્ડિંગનો આનંદ માણે છે અને ક્યારેય ફરિયાદ નથી કરતો. ટીમનો તેના પર પૂરો વિશ્વાસ હોવાથી તેને હોટ સ્પોટ એટલે કે મુશ્કેલ ફિલ્ડિંગ પોઝિશન્સ પર રખાય છે, જ્યાં તે રન રોકવા અને શાનદાર કેચ પકડવા માટે હંમેશા તૈયાર રહે છે. ફિટનેસ અને એથ્લેટિક સ્ટ્રક્ચરના કારણે તેને મેદાન પર લાંબા સમય સુધી દોડવામાં અને જવાબદારી નિભાવવામાં હંમેશા મદદ મળે છે.
