ઇઝરાયેલમાં તાજેતરમાં યોજાયેલી ચૂંટણીના પ્રાથમિક પરિણામોએ વર્તમાન વડાપ્રધાન બેન્જામિન નેતન્યાહૂની મુશ્કેલીઓમાં મોટો વધારો કર્યો છે. આ ચૂંટણીમાં કોઈપણ મોટા રાજકીય બ્લોકને સરકાર બનાવવા માટે જરૂરી બહુમતી મળી શકી નથી, જેના કારણે દેશમાં રાજકીય અનિશ્ચિતતા છવાઈ ગઈ છે. શરૂઆતી ગણતરી મુજબ નેતન્યાહૂનું રાઇટ-વિંગ ગઠબંધન સૌથી મોટો બ્લોક જરૂર બન્યું છે, પરંતુ અરબ પાર્ટીઓના શાનદાર પ્રદર્શને ઇઝરાયેલના રાજકારણમાં એક નવા સમીકરણના દરવાજા ખોલી દીધા છે.
લગભગ 90 ટકા બેલેટ પેપરની ગણતરી બાદ 120 સભ્યોની કનેસેટમાં નેતન્યાહૂનું બ્લોક 53 સીટો મેળવતું દેખાઈ રહ્યું છે, જ્યારે પૂર્વ મિલિટરી ચીફ ગાદી આઈઝેનકોતના નેતૃત્વવાળા ઓપોઝિશન બ્લોકને 48 સીટો મળવાની સંભાવના છે. બીજી તરફ, અરબ-લીડ પાર્ટીઓએ સંયુક્ત રીતે 19 સીટો મેળવીને કિંગમેકરની ભૂમિકા ભજવી છે જેમાં જોઈન્ટ લિસ્ટને 12 અને રામ પાર્ટીને 7 સીટો મળી છે. સરકાર બનાવવા માટે જાદુઈ આંકડો 61 સીટોનો છે, જે નેતન્યાહૂના 53 અને ઓપોઝિશનના 48 બંનેના ગજા બહાર છે. આ ચૂંટણીના ફાઇનલ પરિણામો શુક્રવાર સુધીમાં અને સત્તાવાર જાહેરાત 04 નવેમ્બરે થશે.
જો નેતન્યાહૂ પોતાની સરકાર બનાવવામાં નિષ્ફળ રહે છે તો ઇઝરાયેલના રાષ્ટ્રપતિ આઈઝેક હરઝોગ યોગ્ય પક્ષના નેતાને સરકાર રચવા માટે આમંત્રણ આપશે. જો કોઈ પણ પક્ષ ગઠબંધન ન કરી શકે તો દેશમાં ફરીથી ચૂંટણી યોજાવાની સંભાવના પણ નકારી શકાતી નથી. હાલ તો નેતન્યાહૂ કેરટેકર વડાપ્રધાન તરીકે કામકાજ સંભાળતા રહેશે, પરંતુ ઓપોઝિશન અને અરબ પાર્ટીઓ વચ્ચે જો ઐતિહાસિક અરબ-જ્યુઇશ ગઠબંધન સધાય તો 67 સીટો સાથે વૈકલ્પિક સરકાર બનવાના એંધાણ પણ વર્તાઈ રહ્યા છે.
