ઉત્તર ગુજરાતની જનતા માટે જીવાદોરી સમાન ગણાતી ધરોઈ સિંચાઈ યોજનામાં ચિંતાજનક સમાચાર સામે આવ્યા છે. ઓક્ટોબર મહિનાનો અંત આવતાની સાથે જ ડેમમાં પાણીનો કુલ જથ્થો ઘટીને માત્ર 50.58 ટકા જ બચ્યો છે. આ ચોમાસાની સિઝનમાં વિસ્તારમાં ધાર્યા કરતા ઘણો ઓછો વરસાદ પડવાને કારણે ડેમમાં પાણીની આવક નહીવત રહી હતી. જેને લઈને ખેડૂતોના મોં પર ચિંતાની રેખાઓ સ્પષ્ટ જોવા મળી રહી છે, કારણ કે કમાન્ડ વિસ્તારની કેનાલોમાં સિંચાઈ માટે પાણી છોડવામાં આવ્યું નથી અને આ સ્થિતિ આગામી દિવસોમાં ખેતી માટે મોટો પડકાર બની શકે છે.
ડેમ સાઈટ પરથી પ્રાપ્ત સત્તાવાર આંકડાઓ મુજબ, ધરોઈ જળાશયની કુલ સંગ્રહ ક્ષમતા 813.14 મિલિયન ક્યુબિક મીટર (એમસીએમ) છે, જેની સામે વર્તમાન સમયમાં માત્ર 411.25 મિલિયન ક્યુબિક મીટર પાણી જ સંગ્રહિત છે. ડેમની મહત્તમ સપાટી 622 ફૂટ નક્કી કરાઈ છે, જેની સામે અત્યારની સપાટી ઘટીને 607.75 ફૂટ પર આવી ગઈ છે. જો આ વર્ષની સ્થિતિની સરખામણી ગત વર્ષ સાથે કરીએ તો તસવીર તદ્દન અલગ હતી. ગત વર્ષે 28 ઓક્ટોબરના રોજ ડેમમાં 99.93 ટકા જેટલો જળ જથ્થો ભરાયેલો હતો અને ડેમ હાઈ એલર્ટ પર હોવાથી ખેડૂતોના વાવેતર માટે કેનાલમાં 300 ક્યુસેક પાણી છોડવામાં આવ્યું હતું.
પાણીની અછતને કારણે આ વખતે ઉત્તર ગુજરાતના ખેડૂતો મુશ્કેલીમાં મુકાયા છે અને શિયાળુ વાવેતર તેમજ પશુઓ માટેના ઘાસચારાનું ઉત્પાદન ઘટવાની પૂરી શક્યતા સેવાઈ રહી છે. જો આગામી સમયમાં સિંચાઈ માટે પૂરતું પાણી નહીં મળે તો ખેડૂતોને આર્થિક નુકસાન સહન કરવાનો વારો આવી શકે છે. સ્થાનિક સ્તરે અનેક ખેડૂતો હવે નહેર દ્વારા પાણી છોડવામાં આવે તેવી માંગ કરી રહ્યા છે, પરંતુ ડેમમાં હાલનું જળસ્તર જોતાં પ્રશાસન માટે પણ સિંચાઈનું પાણી છોડવું એક મોટો પડકાર બની રહેશે.
