દાહોદ જિલ્લાના સિંગવડ તાલુકાના ચુંદડી ગામે ખનીજ માફિયાઓ દ્વારા ચલાવવામાં આવી રહેલા ગેરકાયદે ખનન સામે તંત્રએ સકંજો કસ્યો છે. ખાણ-ખનીજ વિભાગ, સિંગવડ મામલતદાર કચેરી અને રણધીકપુર પોલીસની ટીમે બાતમીના આધારે સંયુક્ત રીતે આ વિસ્તારમાં ઓચિંતી તપાસ હાથ ધરી હતી, જેના કારણે ખનન કરતા તત્વોમાં ભારે હચમચ મચી ગઈ હતી.
સ્થળ તપાસ દરમિયાન ત્યાં ગેરકાયદેસર રીતે સફેદ પથ્થર એટલે કે ક્વાર્ટ્ઝ ખનીજનું ઉત્ખનન થઈ રહ્યું હોવાનું સામે આવ્યું હતું. આ દરોડામાં ખનીજ ભરેલી કુલ 5 ટ્રકો અને ખનન કામગીરીમાં વપરાતું 1 જેસીબી મશીન ઝડપાઈ ગયું હતું. અધિકારીઓએ તાત્કાલિક તમામ વાહનો અને મશીનરી કબજે કરીને આશરે રૂ. 15 લાખનો કુલ મુદ્દામાલ જપ્ત કર્યો હતો.
હાલ ખાણ-ખનીજ વિભાગ દ્વારા આ મામલે જરૂરી પરવાનગીઓ અને દસ્તાવેજોની ચકાસણી કરીને દંડકીય કાર્યવાહીની પ્રક્રિયા શરૂ કરવામાં આવી છે. વહીવટી તંત્રની આ અચાનક અને કડક કાર્યવાહીના કારણે સમગ્ર પંથકમાં ખળભળાટ મચી ગયો છે અને ગેરકાયદેસર ખનન કરતા લોકોમાં ફફડાટ ફેલાયો છે.
