દેશના 4 રાજ્યોમાં યોજાયેલી 28 એમએલસી બેઠકોની ચૂંટણીના પરિણામોમાં ભાજપની આગેવાનીવાળા એનડીએ ગઠબંધને શાનદાર પ્રદર્શન કરતા 16 બેઠકો પર કબજો જમાવ્યો છે. મંગળવારથી શરૂ થયેલી બેલેટ પેપરની મતગણતરી બુધવાર મોડી રાત સુધી ચાલી હતી, જેમાં ખાસ કરીને કર્ણાટકમાં એનડીએએ તમામ 4 લેજિસ્લેટીવ કાઉન્સિલ મતવિસ્તારોમાં સફાચટ વિજય મેળવીને કોંગ્રેસને મોટો ઝટકો આપ્યો છે. આ ચૂંટણીમાં કોંગ્રેસ પક્ષની આંતરિક ખટપટ અને સંગઠનાત્મક નબળાઈઓ ખુલ્લી પડી ગઈ હતી, જેના કારણે પાર્ટીને અપેક્ષા મુજબનું પરિણામ મળ્યું ન હતું.
કર્ણાટકમાં જેડીએસ દ્વારા બેંગલુરુ ટીચર્સ સીટ કોંગ્રેસ પાસેથી આંચકી લેવામાં આવી હતી, જ્યારે ભાજપે નોર્થ ઈસ્ટ ટીચર્સ, વેસ્ટ ગ્રેજ્યુએટ્સ અને સાઉથ ઈસ્ટ ગ્રેજ્યુએટ્સ બેઠકો જીતી લીધી હતી. રાજ્યના સીએમ પદ સંભાળ્યા પછી પહેલીવાર ચૂંટણીનો સામનો કરી રહેલા ડી કે શિવકુમારે પરિણામો સ્વીકારતા જણાવ્યું હતું કે પાર્ટી આ મામલે યોગ્ય સુધારાત્મક પગલાં લેશે. બીજી તરફ બિહારમાં એનડીએએ 8માંથી 4 બેઠકો જીતી હતી, જ્યારે આરજેડી અને પ્રશાંત કિશોરની જન સુરાજ પાર્ટીએ 1-1 બેઠક પર વિજય મેળવ્યો હતો. જન સુરાજના ઉમેદવારે દરભંગા ટીચર્સ સીટ પર વિજય મેળવીને પ્રશાંત કિશોરની પાર્ટીને કાઉન્સિલની પહેલી બેઠક અપાવી હતી અને સીપીઆઈનું એકમાત્ર પ્રતિનિધિત્વ પણ ખતમ કરી નાખ્યું હતું.
ઉત્તર પ્રદેશમાં બુધવાર સાંજ સુધીમાં જાહેર થયેલા પરિણામોમાં ભાજપે 6 અને એસપીએ 3 બેઠકો જીતી લીધી હતી, જ્યારે લખનૌ અને વારાણસીમાં મતગણતરી ચાલુ રહી હતી. મહારાષ્ટ્રની 5 એમએલસી બેઠકો પર મહાયુતિ અને વિપક્ષી ગઠબંધન એમવીએ વચ્ચે કાંટાની ટક્કર રહી હતી અને બંનેએ 2-2 બેઠકો જીતી હતી, જેમાં શરદ પવારની એનસીપી-એસપીએ પણ બે બેઠકો મેળવી હતી. નાગપુરમાં 40 કલાકથી વધુ સમય સુધી ચાલેલી મતગણતરી બાદ પણ ચિત્ર સ્પષ્ટ થયું ન હતું અને ભાજપ તથા કોંગ્રેસના ઉમેદવારો વચ્ચે ભારે રસાકસી જોવા મળી હતી. આ ચૂંટણી પરિણામોએ દેશના રાજકારણમાં આગામી દિવસોમાં નવા સમીકરણો સર્જાવાના સંકેતો આપી દીધા છે.
