મહેસાણા રેલવે સ્ટેશન પર પોલીસ દ્વારા દારૂની હેરાફેરી અટકાવવા માટે ખાસ ડ્રાઇવ ચલાવવામાં આવી રહી છે, ત્યારે પોલીસને મળેલી ચોક્કસ બાતમીના આધારે એક મોટી સફળતા મળી છે. યોગા એક્સપ્રેસ ટ્રેન મહેસાણા રેલવે સ્ટેશન પર પહોંચી ત્યારે પ્લેટફોર્મ નં. 06 પરથી નીચે ઉતરેલા બે શંકાસ્પદ યુવકોને પોલીસે ત્વરિત કોર્ડન કરીને તપાસ શરૂ કરી હતી. પોલીસની આ અચાનક કાર્યવાહીથી સ્ટેશન પર થોડીવાર માટે હલચલ મચી ગઈ હતી અને બંને યુવકોની સઘન પૂછપરછ હાથ ધરવામાં આવી હતી.
પોલીસ તપાસ દરમિયાન પકડાયેલા યુવકોની ઓળખ સુમિત અમરતજી ઠાકોર (ઉં.વ. 23) અને મુનાજી ભુપતજી ઠાકોર (ઉં.વ. 24) તરીકે થઈ છે. આ બંને યુવકોએ પોલીસની નજરથી બચવા માટે અનોખી ચાલબાજી અપનાવી હતી અને પોતાના શરીરે સેલોટેપ લગાવીને રાજસ્થાન બનાવટની સ્કોચ અને વ્હિસ્કીની બોટલો બાંધી હતી. આ ઉપરાંત તેમની પાસેથી કોલેજ બેગ, બે મોબાઇલ ફોન અને રોકડ રકમ પણ મળી આવી હતી. પોલીસે તેમની પાસેથી જપ્ત કરેલા કુલ 14,130 એમ.એલ. દારૂ અને અન્ય સામાન સહિત કુલ રૂ. 33,661 નો મુદ્દામાલ કબજે કર્યો છે.
રેલવે પોલીસે આ મામલે બંને આરોપીઓ વિરુદ્ધ પ્રોહિબિશન એક્ટ હેઠળ કડક ગુનો નોંધીને આગળની કાયદેસરની કાર્યવાહી હાથ ધરી છે. આ બંને યુવકો દારૂનો આ જથ્થો ક્યાંથી લાવ્યા હતા અને કયા શખ્સોને પહોંચાડવાના હતા તે દિશામાં પોલીસે તપાસના ચક્રો ગતિમાન કર્યા છે. રેલવે રૂટ પર અવારનવાર થતી આવી ગેરકાયદેસર પ્રવૃત્તિઓ પર લગામ કસવા માટે પોલીસ દ્વારા આગામી દિવસોમાં પણ આવી જ સઘન ચેકિંગ ડ્રાઇવ ચાલુ રાખવામાં આવશે.
