વેસ્ટ એશિયામાં ચાલી રહેલા ભીષણ સંઘર્ષ અને તણાવ વચ્ચે દેશ માટે એક દુઃખદ સમાચાર સામે આવ્યા છે. વિદેશ મંત્રાલયે બુધવારે સત્તાવાર રીતે પુષ્ટિ કરી છે કે આ સંઘર્ષની ઝપેટમાં આવીને અત્યાર સુધીમાં કુલ 22 ભારતીય નાગરિકોએ પોતાના પ્રાણ ગુમાવ્યા છે. આ ગંભીર સ્થિતિને લઈને ભારતે પોતાની ઊંડી ચિંતા વ્યક્ત કરી છે અને પ્રદેશમાં બગડતી સુરક્ષા વ્યવસ્થા પર સતત નજર રાખવામાં આવી રહી છે. મંત્રાલયના સત્તાવાર પ્રવક્તાએ જણાવ્યું હતું કે ભારત સરકાર ત્યાં રહેતા પોતાના નાગરિકો અને કામદારોની સુરક્ષાને લઈને પૂરી રીતે સતર્ક છે અને રાજદ્વારી મિશન સતત ભારતીય સમુદાયના સંપર્કમાં છે.
મંત્રાલય દ્વારા આપવામાં આવેલી વિગતો મુજબ આ 22 મૃતકોમાં 14 ખલાસીઓ એટલે કે સીફેરર્સ પણ સામેલ છે, જેઓ દરિયાઈ માર્ગે કામ કરી રહ્યા હતા. આ ઉપરાંત સાઉદી અરેબિયામાં પણ પ્રાદેશિક અસ્થિરતાની ઘટનાઓમાં 3 ભારતીયોના મોત થયાની પુષ્ટિ કરવામાં આવી છે. આ સંઘર્ષગ્રસ્ત વિસ્તારમાં ફસાયેલા કે પ્રભાવિત થયેલા ભારતીયોની સુરક્ષા અને કલ્યાણ સુનિશ્ચિત કરવા માટે વેસ્ટ એશિયામાં આવેલા તમામ ભારતીય ડિપ્લોમેટિક પોઈન્ટ્સ ગતિવિધિઓ પર ચાંપતી નજર રાખી રહ્યા છે. ખાસ કરીને ઓપરેશનલ મેરિટાઈમ કોરિડોરમાં કામ કરતા વર્કર્સ અને ખલાસીઓની સુરક્ષાને સર્વોચ્ચ પ્રાથમિકતા આપવામાં આવી રહી છે.
બીજી બાજુ, સાઉદી અરેબિયાના જેદ્દાહ સ્થિત ભારતીય કોન્સ્યુલેટે ફ્લાઈટ રદ થવા કે Disrupt થવાથી મુશ્કેલીમાં મુકાયેલા ઉમરાહ યાત્રાળુઓ અને અન્ય નાગરિકો માટે નવી ટ્રાવેલ એડવાઈઝરી જાહેર કરી છે. સાઉદી ઓથોરિટીઝ અને એરલાઈન્સ સાથે મળીને કનેક્ટિવિટી વધારવામાં આવી છે, જેમાં ફ્લાયનાસ જેવી પ્રાઈવેટ એરલાઈન્સે દમ્મામ અને રિયાધથી લખનૌ, મુંબઈ, દિલ્હી, હૈદરાબાદ, કોઝિકોડ અને કોચી માટે વધારાની ફ્લાઈટ્સની જાહેરાત કરી છે. કોન્સ્યુલેટે સ્પષ્ટ કર્યું છે કે કન્ફર્મ બુકિંગ વગર એરપોર્ટ પર ન જવું અને મુસાફરો મુશ્કેલીના સમયે મદદ માટે જેદ્દાહ અને મક્કા ખાતે કાર્યરત 24x7 કંટ્રોલ રૂમનો સંપર્ક કરી શકે છે.
