કર્નાટકની લેજિસ્લેટિવ કાઉન્સિલ ચૂંટણીમાં એનડીએની શાનદાર જીતથી આગામી 2028ની વિધાનસભા ચૂંટણી પહેલા રાજકારણ ગરમાયું છે. બેંગલુરુના મલ્લેશ્વરમ સ્થિત ભાજપ ઓફિસ ખાતે મીડિયા સાથે વાત કરતા વિપક્ષના નેતા આર અશોકે આત્મવિશ્વાસ વ્યક્ત કર્યો હતો કે જો ભાજપ અને જેડીએસનું ગઠબંધન આવી જ એકતા જાળવી રાખશે, તો 2028માં સત્તામાં વાપસી નિશ્ચિત છે. તેમણે આ જીત પાછળ બંને પાર્ટીના નેતાઓ, ધારાસભ્યો અને કાર્યકર્તાઓની સખત મહેનત અને ઉત્તમ સંકલનને શ્રેય આપ્યો હતો, જેના કારણે એનડીએ ઉમેદવારની ભવ્ય જીત શક્ય બની શકી હતી.
બેલેટ પેપરથી યોજાયેલી આ ચૂંટણીમાં કોંગ્રેસ સમર્થિત ઉમેદવાર પુત્તન્નાની હારને સીએમ ડીકે શિવકુમાર માટે મોટો રાજકીય ફટકો માનવામાં આવી રહ્યો છે, કારણ કે શિવકુમારે આ બેઠક માટે વ્યક્તિગત જવાબદારી લીધી હતી. આર અશોકે કટાક્ષ કર્યો હતો કે કોંગ્રેસ અગાઉ ઈવીએમ પર દોષનો ટोपલો નાખતી હતી, પરંતુ બેલેટ પેપરથી થયેલી આ ચૂંટણીમાં પણ જનતાએ ભાજપ-જેડીએસ ગઠબંધનને સ્પષ્ટના રસ્તે જીતાડ્યું છે. ઉમેદવાર રંગાનાથના નામ પર યુનિયન મિનિસ્ટર એચડી કુમારસ્વામી સાથે ચર્ચા કરીને સર્વાનુમતે મહોર મારવામાં આવી હતી અને બેંગલુરુમાં વોર્ડ લેવલ સુધીનું કેમ્પેઈન ચલાવવામાં આવ્યું હતું.
આર અશોકે કોંગ્રેસ સરકાર પર પ્રહાર કરતા કહ્યું કે ભ્રષ્ટાચાર અને આંતરિક વિખવાદના કારણે આ સરકાર નબળી પડી ગઈ છે અને જનતાના મનમાં સવાલ ઉઠી રહ્યા છે કે આ સરકાર પોતાનો કાર્યકાળ પૂરો કરી શકશે કે નહીં. તેમણે સ્પષ્ટ કર્યું કે ભાજપ અને જેડીએસ આગામી સમયમાં પણ આ જ મજબૂત સંકલન સાથે મેદાનમાં ઉતરશે અને આ ચૂંટણી પરિણામો 2028ની વિધાનસભા ચૂંટણી માટે એક દિશાસૂચક સાબિત થશે. પાર્ટીના રાષ્ટ્રીય મહાસચિવ બીએલ સંતોષના માર્ગદર્શન હેઠળ થયેલી આ રણનીતિથી એનડીએ છાવણીમાં ભારે ઉત્સાહ છે.
