મિનેસોટાના સ્ટીવેન્સ કાઉન્ટીમાં એક શાંત ખેતરમાં મકાઈના પાકની વચ્ચેથી અચાનક એક વિશાળ મેટલ ઓબ્જેક્ટ મળી આવતા ભારે કુતૂહલ સર્જાયું હતું. 14 ઓક્ટોબરના રોજ જ્યારે એક ખેડૂત કમ્બાઈન મશીન લઈને મકાઈની કાપણી કરી રહ્યો હતો, ત્યારે તેની નજરે આ વિચિત્ર વસ્તુ પડી હતી. મકાઈની ઊંચાઈ પરથી અંદાજ લગાવવામાં આવ્યો કે આ વસ્તુ છેલ્લા 6 સપ્તાહથી ખેતરમાં પડેલી હોઈ શકે છે. આ ઘટનાની જાણ થતાં જ સ્ટીવેન્સ કાઉન્ટી પોલીસ વિભાગના અધિકારીઓ તાત્કાલિક ઘટનાસ્થળે દોડી આવ્યા હતા અને આ વિદેશી મટિરિયલની તપાસ શરૂ કરી હતી.
પોલીસ તપાસમાં બહાર આવ્યું કે આ ચમકદાર ધાતુની રચના લગભગ 11 ફૂટની પહોળાઈ ધરાવે છે અને તે બરાબર બાઉલ જેવો આકાર ધરાવે છે. આ ઓબ્જેક્ટ પર બળેલા નિશાન પણ જોવા મળ્યા હતા, જે દર્શાવે છે કે તે પૃથ્વીના વાતાવરણમાં પ્રવેશીને નીચે પડ્યું હશે. જોકે પોલીસે સ્પષ્ટ કર્યું હતું કે આ વસ્તુથી જનતાને કોઈ જોખમ નથી, છતાં તેની ઉત્પત્તિને લઈને રહસ્ય યથાવત રહ્યું હતું. સોશિયલ મીડિયા પર લોકોએ તેને મૂવીઝની ફ્લાઈંગ સોસર કે એમ્યુઝમેન્ટ પાર્કનું સાધન ગણાવીને અનેક અટકળો લગાવી હતી, પરંતુ બાદમાં મામલો સ્પેસ ડેબ્રિસ એટલે કે અવકાશી કચરા તરફ વળ્યો હતો.
આ રહસ્ય પાછળ સપ્ટેમ્બર મહિનામાં લોન્ચ થયેલા ચીનના ઝુક્વે-2ઈ રોકેટ સાથે કનેક્શન હોવાની પ્રબળ સંભાવના વ્યક્ત કરવામાં આવી રહી છે. ચીનના આ રોકેટનું અપર સ્ટેજ બરાબર 11 ફૂટનું હતું, જે મિનેસોટામાંથી મળેલા ઓબ્જેક્ટના કદ સાથે બિલકુલ મેચ થાય છે. આ રોકેટ સેટેલાઇટ છોડ્યા બાદ પૃથ્વીના વાતાવરણમાં પાછું ફરતી વખતે ટુકડા થઈ ગયું હતું. સ્પેસ એક્સપર્ટ્સ પણ તેને ચીની રોકેટનો જ ભાગ માની રહ્યા છે. આ ઘટનાએ ફરી એકવાર સાબિત કરી દીધું છે કે સ્પેસમાં વધી રહેલા ટ્રાફિક અને સેટેલાઇટ લોન્ચિંગના કારણે પૃથ્વી પર અવકાશી કચરો પડવાના જોખમો હવે વધી રહ્યા છે.
