અમેરિકામાં રિન્યુએબલ એનર્જી માટે સોલાર ફાર્મ્સનો વ્યાપ ઝડપથી વધી રહ્યો છે, પરંતુ તેના કારણે ફળદ્રુપ ખેતીની જમીન ઓછી થવાનો મોટો પ્રશ્ન ઊભો થયો છે. આ સમસ્યાનો રસ્તો કાઢવા માટે ન્યૂયોર્કની કોર્નેલ યુનિવર્સિટીના રિસર્ચર્સે એક રસપ્રદ અને અનોખો પ્રયોગ શરૂ કર્યો છે. વર્ષ 2019માં ન્યૂયોર્કના ડ્રાઈડન ખાતે આવેલા કાસ્કાડિલા કોમ્યુનિટી સોલાર ફાર્મમાં સોલાર પેનલની નીચે ઘેટાં ચરાવવાની આ પહેલ શરૂ કરવામાં આવી હતી. આ પ્રોજેક્ટ પાછળનો મુખ્ય હેતુ એ ચકાસવાનો હતો કે શું ઘેટાં સોલાર પાવર પ્રોડક્શન અને ખેતી બંનેને સાથે મળીને આગળ વધારવામાં મદદરૂપ થઈ શકે છે કે નહીં.
સામાન્ય રીતે સોલાર ઓપરેટર્સ સોલાર પેનલની આસપાસ ઉગેલા ઘાસ અને છોડને કાપવા માટે મશીન કે ટ્રીમિંગનો સહારો લેતા હોય છે, જેનો ખર્ચ પણ ઘણો થાય છે. આ રિસર્ચ ટીમ દ્વારા જુદી જુદી ઘેટાંની ડેન્સિટી સાથે પ્રયોગ કરવામાં આવ્યો કે જેથી જમીન કે સોલાર પ્લેટને નુકસાન પહોંચાડ્યા વગર ઘાસનું નિયંત્રણ કેવી રીતે કરી શકાય. આ પ્રયોગના શરૂઆતના પરિણામોમાં એવું બહાર આવ્યું કે યોગ્ય પ્રમાણમાં ઘેટાંને ચરાવવાથી સોલાર એરિયામાં પ્લાન્ટ મેનેજમેન્ટ ખૂબ જ સરળ બની ગયું. આ સાથે ઘેટાંને પણ સોલાર પેનલના છાંયડામાં કુદરતી ઘાસ અને આશરો મળી ગયો, જેનાથી પશુપાલકો અને સોલાર કંપનીઓ બંનેને ફાયદો થયો.
ખેતી અને રિન્યુએબલ એનર્જીના આ અનોખા સંગમને એગ્રીવોલ્ટાઈક્સ કહેવામાં આવે છે, જેમાં એક જ જમીનનો ઉપયોગ બે અલગ-અલગ હેતુઓ માટે થાય છે. આ વ્યવસ્થાથી ખેડૂતોને સોલાર ડેવલપર્સને વેજીટેશન મેનેજમેન્ટની સર્વિસ આપીને નવી કમાણીનું સાધન મળ્યું છે, તો બીજી બાજુ સોલાર ઓપરેટર્સનો ઘાસ કાપવાનો ખર્ચ અને મહેનત ઘટી ગઈ છે. રિસર્ચર્સ દ્વારા માત્ર ઘાસ જ નહીં, પરંતુ પશુઓની તબિયત, જમીનમાં કાર્બનનું પ્રમાણ અને પોલિનેટર હેબિટેટ પર પણ ઊંડાણપૂર્વક અભ્યાસ કરવામાં આવ્યો છે. આ સફળ પ્રયોગ સાબિત કરે છે કે ભવિષ્યમાં જમીનના યોગ્ય ઉપયોગ દ્વારા ઊર્જા ઉત્પાદન અને કૃષિ ક્ષેત્ર એકસાથે હાથ મિલાવીને આગળ વધી શકે છે.
