ઉના-વેરાવળ હાઇવે પર માર્ગ સલામતી અને વધતા અકસ્માતો ફરી એકવાર ગંભીર ચર્ચાનો વિષય બન્યા છે, કેમ કે હાઇવે પર આવેલા કેસરિયા અને નાથળ ગામ વચ્ચેના કુખ્યાત ખાણિયાધાર વિસ્તાર નજીક એક ભયાનક અકસ્માત સર્જાયો હતો. પૂરપાટ ઝડપે દોડતા ટ્રકે આગળ જઈ રહેલા એક બાઈકને જોરદાર ટક્કર મારતા ૧૮ વર્ષીય યુવતીનું ઘટનાસ્થળે જ દર્દનાક મોત નીપજ્યું હતું. ભાઈની નજર સમક્ષ જ બહેનનું અચાનક અવસાન થતાં અને માર્ગ પર ગમખ્વાર દ્રશ્યો સર્જાતા સમગ્ર પંથકમાં ભારે અરેરાટી સાથે શોકનું મોજું ફરી વળ્યું છે.
પ્રાપ્ત વિગતો અનુસાર, કાજરડી ગામના રહેવાસી પ્રીતમ વાળા પોતાની મોટરસાઇકલ પર માતા પાંચીબેન અને ૧૮ વર્ષીય બહેન પ્રતિજ્ઞાબેનને બેસાડીને ઉના તરફ આવી રહ્યા હતા તે દરમિયાન પૂરપાટ ઝડપે આવી રહેલા એક બેકાબૂ ટ્રક ચાલકે બાઈકને જોરદાર ટક્કર મારી હતી. આ ટક્કર એટલી જોરદાર હતી કે બાઈક ફંગોળાઈને આગળ જતી એક ઓટો રિક્ષા સાથે ધડાકાભેર અથડાઈ હતી, જેના કારણે પ્રતિજ્ઞાબેનના માથાના ભાગે ગંભીર ઈજાઓ થવાથી તેમનું સ્થળ પર જ મોત થયું હતું. દીકરીનું મોત નિહાળીને માતા પાંચીબેન આઘાતમાં સરી જઈને બેભાન થઈ ગયા હતા, જ્યારે આસપાસના લોકોએ ૧૦૮ એમ્બ્યુલન્સ બોલાવીને ઇજાગ્રસ્તોને ઉનાની ખાનગી હોસ્પિટલ ખસેડ્યા હતા અને મૃતક યુવતીના નશ્વર દેહને સરકારી હોસ્પિટલ મોકલ્યો હતો.
અકસ્માત સર્જ્યા બાદ ટ્રક ચાલક ગાડી ભગાડીને નાસી છૂટવાનો પ્રયાસ કરી રહ્યો હતો, પરંતુ ઘટનાસ્થળે ઉપસ્થિત જાગૃત અને સાહસિક લોકોએ હિંમત દાખવીને ટ્રકનો લાંબો પીછો કર્યો હતો અને અંદાજે 10 કિલોમીટર દૂર જઈને તેને ઝડપી પાડ્યો હતો. આ પરિવાર સગાના ઘરે પુત્ર જન્મની ખુશીમાં અભિનંદન પાઠવવા અને બહેન નવા કપડાં ખરીદવાના હેતુથી નીકળ્યો હતો, પરંતુ અચાનક સર્જાયેલી આ કરૂણ દુર્ઘટનાએ ખુશીના માહોલને ક્ષણભરમાં શોકમાં ફેરવી નાખ્યો છે. આ બનાવ અંગે ઉના પોલીસ સ્ટેશનનો સ્ટાફ તાત્કાલિક ઘટનાસ્થળે પહોંચીને કાયદેસરની કાર્યવાહી હાથ ધરી છે અને આરોપી ટ્રક ચાલક સામે સઘન તપાસ શરૂ કરી છે.
