સોમવારે રાત્રે ગુવાહાટીની હોટેલ બિલાસ ઇન ખાતે થયેલા ગોળીબારના ધ્રુજાવી દેનારા કેસમાં પકડાયેલા આરોપી ઘનકાંતા ગોગોઈએ પોલીસ કસ્ટડી દરમિયાન પોતાના એન્કાઉન્ટરનો ડર વ્યક્ત કર્યો છે. આ ઘટનામાં 5 લોકોના મોત થયા હતા અને 1 વ્યક્તિ ઘાયલ થઈ હતી. ઘટના બાદ તરત જ ધરપકડ કરાયેલા આરોપીને મંગળવારે કોર્ટમાં રજૂ કરવામાં આવ્યો હતો, જ્યાંથી તેને 7 દિવસની પોલીસ કસ્ટડીમાં મોકલવામાં આવ્યો છે. આરોપીના વકીલે તેની સુરક્ષાને લઈને ચિંતા વ્યક્ત કરતી અરજી દાખલ કરી હતી, જેને ધ્યાનમાં રાખીને કોર્ટે કડક આદેશો જારી કર્યા છે.
આ ભયાનક ગોળીબાર પાછળનું મુખ્ય કારણ હોટેલના લીઝ અને વહીવટને લઈને ચાલી રહેલો વિવાદ હોવાનું પોલીસ તપાસમાં બહાર આવ્યું છે. ભરાલી પરિવારની આ હોટેલ 10 સપ્ટેમ્બર 2025ના રોજ 5 વર્ષના કરાર પર આશરે 1.8 લાખ રૂપિયાના માસિક ભાડે ઘનકાંતા ગોગોઈને આપવામાં આવી હતી. ગોગોઈએ પ્રોપર્ટીનું રેનોવેશન કરાવ્યા બાદ તેના ઉપયોગ અને સુવિધાઓ બાબતે બંને પક્ષો વચ્ચે મતભેદો શરૂ થયા હતા. આ મામલો થાળે પાડવા માટે સોમવારે હોટેલમાં એક મીટીંગ બોલાવવામાં આવી હતી, પરંતુ મીટીંગ શરૂ થાય તે પહેલા જ બોલાચાલી વધી ગઈ અને ઉશ્કેરાયેલા ગોગોઈએ અંધાધૂંધ ફાયરિંગ શરૂ કરી દીધું હતું. આ ગોળીબારમાં ભુદેવ ભરાલી, તેમની બહેન હેલેના, તેમનો પુત્ર દેબર્ષિ કશ્યપ, પુત્રવધૂ રિનિકા કશ્યપ અને સ્ટાફર નારાયણ દાસના મોત થયા હતા, જ્યારે પરિવારના ડ્રાઇવર સત્યેન્દ્ર પાઠક ગંભીર રીતે ઘાયલ થયા હતા.
આ ગંભીર મામલાની તપાસ માટે પોલીસે એક સ્પેશિયલ ઇન્વેસ્ટિગેશન ટીમ એટલે કે SITની રચના કરી છે. આરોપીની સુરક્ષાને લઈને કોર્ટે સ્પષ્ટ આદેશ આપ્યો છે કે પોલીસ પૂછપરછ દરમિયાન કસ્ટોડિયલ ટોર્ચર ન થવું જોઈએ અને તેને પાયાની જરૂરિયાતો મળવી જોઈએ. સાથે જ દર 24 કલાકે આરોપીની મેડિકલ તપાસ ફરજિયાત કરવામાં આવી છે. પુરાવા એકત્ર કરવાની કામગીરી દરમિયાન DSP રેન્કનો અધિકારી સાથે રહેશે અને જો સૂર્યોદય પહેલા કે સૂર્યાસ્ત પછી આ ઓપરેશન કરવું પડે તો વધારાની સુરક્ષા વ્યવસ્થા ગોઠવવી પડશે.
