ગાંધીનગર શહેરમાંથી એક અત્યંત ચોંકાવનારા અને દુઃખદ સમાચાર સામે આવ્યા છે, જ્યાં ગુજરાતના મુખ્યમંત્રીની સુરક્ષા વ્યવસ્થામાં તૈનાત પોલીસ સબ ઈન્સ્પેક્ટર એટલે કે PSI તન્વીરસિંહ ઝાલાએ પોતાના જ સરકારી હથિયારથી આપઘાત કરી લીધો છે. આ ઘટના બનતાની સાથે જ સમગ્ર પોલીસ વિભાગમાં ભારે ખળભળાટ મચી ગયો હતો અને ઉચ્ચ અધિકારીઓમાં દોડધામ થઈ ગઈ હતી. બનાવની ગંભીરતાને જોઈને સ્થાનિક પોલીસ કાફલો તુરંત જ ઘટનાસ્થળે દોડી ગયો હતો અને મૃતદેહને કબજે કરીને આગળની કાર્યવાહી હાથ ધરી હતી.
ઘટનાની જાણ થતાં જ વરિષ્ઠ પોલીસ અધિકારીઓ ઘટનાસ્થળે પહોંચી ગયા હતા અને મૃતદેહને પોસ્ટમોર્ટમ માટે સિવિલ હોસ્પિટલ ખસેડવામાં આવ્યો હતો. આ રહસ્યમય આપઘાતની સચોટ કડીઓ મેળવવા માટે પોલીસ દ્વારા FSLની ટીમની પણ મદદ લેવામાં આવી રહી છે. પ્રાથમિક અનુમાન લગાવવામાં આવી રહ્યું છે કે કોઈ પારિવારિક કારણો, ઘરકંકાસ કે પછી અંગત માનસિક તણાવના કારણે PSI તન્વીરસિંહ ઝાલાએ આ ખોટું પગલું ભર્યું હોઈ શકે છે, જોકે આ બાબતે હજુ સુધી કોઈ સત્તાવાર પુષ્ટિ કરવામાં આવી નથી.
હાલ પોલીસ દ્વારા મૃતકના પરિવારજનો, મિત્રો તેમજ સાથે કામ કરતા સહકર્મીઓની પૂછપરછનો ધમધમાટ શરૂ કરવામાં આવ્યો છે. ઘટનાસ્થળેથી મળેલા પુરાવા અને ફોરેન્સિક રિપોર્ટના આધારે આ દુર્ઘટના પાછળનું અસલી કારણ બહાર આવશે. પોલીસ આ મામેલ વધુ ઊંડાણપૂર્વક તપાસ ચલાવી રહી છે જેથી આત્મહત્યા પાછળના સાચા તથ્યો બહાર આવી શકે.
