અમેરિકાના રાજકારણમાં હંમેશા ચર્ચામાં રહેતી કોંગ્રેસવુમન ઇલ્હાન ઓમરની મુશ્કેલીઓમાં ફરી વધારો થયો છે. તેમની ઓળખ અને પારિવારિક સંબંધોને લઈને જૂના વિવાદો ફરી સપાટી પર આવ્યા છે, જેમાં ખાસ કરીને તેમના પોતાના ભાઈ સાથે લગ્ન કર્યા હોવાના ગંભીર દાવાઓ પર નવેસરથી ચર્ચા શરૂ થઈ છે. આ સમગ્ર મામલાની પૃષ્ઠભૂમિમાં ઇલ્હાન ઓમરની એક વર્ષો જૂની ટ્વીટ સામે આવી છે, જેને અગાઉ ડીલીટ કરી દેવામાં આવી હતી, પરંતુ હવે તેના સ્ક્રીનશોટ અને ચર્ચાઓ વાયરલ થઈ રહી છે.
આ વિવાદનું મુખ્ય કેન્દ્ર ઇલ્હાન ઓમરની તે ડીલીટ કરેલી ટ્વીટ છે જેમાં 'My aabo Nur Said' એવો ઉલ્લેખ જોવા મળ્યો હતો. આ વિવાદાસ્પદ અટક સામે આવ્યા બાદ તેમના પર લાગેલા આરોપોને વધુ બળ મળ્યું છે. જોકે, ઇલ્હાન ઓમરે ભૂતકાળમાં આવા તમામ દાવાઓને સદંતર નકારી કાઢ્યા છે અને તેને રાજકીય બદઈરાદાથી ફેલાવવામાં આવેલી અવાસ્તવિક વાતો ગણાવી છે. પરંતુ, આ સોશિયલ મીડિયા પોસ્ટ ડિલીટ કરાઈ હોવા છતાં તેમાંથી નવા પુરાવા મળ્યા હોવાનો દાવો વિરોધીઓ દ્વારા થઈ રહ્યો છે, કારણ કે હાલમાં ફેડરલ એજન્સીઓ દ્વારા તેમના પર ઇમિગ્રેશન ફ્રોડ, શંકાસ્પદ લગ્ન અને નાણાકીય ગેરરીતિઓના મામલે સઘન તપાસ ચાલી રહી છે.
આ લાંબા સમયથી ચાલતા વિવાદના કારણે અમેરિકન રાજકારણમાં ગરમાવો આવ્યો છે અને આગામી દિવસોમાં ફેડરલ એજન્સીઓની તપાસના અંતે શું બહાર આવે છે તેના પર સૌની નજર ટકેલી છે. ઇલ્હાન ઓમર માટે આ કાયદાકીય અને રાજકીય લડાઈ વધુ મુશ્કેલ બનતી જાય છે, કારણ કે આવા જૂના દસ્તાવેજો અને સોશિયલ મીડિયા પોસ્ટ્સ તપાસ અધિકારીઓ માટે મહત્વની કડી સાબિત થઈ શકે છે. આ મામલાની વ્યાપક અસર તેમની રાજકીય કારકિર્દી પર પડી રહી છે અને જો આરોપો સાબિત થાય તો તેમને ગંભીર પરિણામોનો સામનો કરવો પડી શકે છે.
