હોલીવુડ એક્ટર ક્રિસ હેમ્સવર્થે અને તેમની પત્ની એલસા પટાકીએ વર્ષ 2014માં ઓસ્ટ્રેલિયાના બાયરોન બે પાસે આવેલી 4.2 હેક્ટર એટલે કે આશરે 10.4 એકર જમીન A$7 મિલિયન આપીને ખરીદી હતી. આ પ્રોપર્ટી પર અગાઉ એક બાલીનીઝ સ્ટાઇલનું આઠ બેડરૂમવાળું રીસોર્ટ હતું, જેને આ કપલે તોડીને એક આધુનિક મેન્શનમાં પરિવર્તિત કરી દીધું છે. લોસ એન્જલસની લાઇફસ્ટાઇલ છોડીને શાંતિપૂર્ણ માહોલમાં રહેવા માટે આ કપલે ઓસ્ટ્રેલિયાના દરિયાકાંઠાના આ વિસ્તારને પોતાનું ઘર બનાવવાનું નક્કી કર્યું હતું, જેના બાંધકામને લઈને સ્થાનિક સ્તરે પણ ઘણી ચર્ચા થઈ હતી.
આ પ્રોપર્ટીના રિડેવલપમેન્ટ પાછળ મોટો ખર્ચ કરવામાં આવ્યો છે, જેમાં નવા ઘરમાં 6 બેડરૂમ, જિમ, સ્ટીમ રૂમ, મીડિયા રૂમ અને ગેમ્સ રૂમ બનાવવામાં આવ્યા છે. આ પ્રોપર્ટીનું સૌથી મોટું આકર્ષણ તેનો 50 મીટર લાંબો રૂફટોપ ઇન્ફિનિટી પુલ છે. વર્ષ 2019માં બાંધકામ પાછળ આશરે A$8.8 મિલિયનનો ખર્ચ અંદાજવામાં આવ્યો હતો અને તે સમયે આ ઘરની કિંમત આશરે A$20 મિલિયન આંકવામાં આવી હતી, જે સમયની સાથે વધીને હવે અંદાજે A$75 મિલિયન સુધી પહોંચી હોવાની ચર્ચા છે. તાજેતરના રિપોર્ટ્સ મુજબ આ એસ્ટેટમાં ટેનિસ કોર્ટ અને લગભગ A$150,000 ના અંદાજિત ખર્ચે તૈયાર થયેલ ડર્ટ-બાઇક ટ્રેક જેવી નવી મનોરંજન સુવિધાઓ પણ ઉમેરવામાં આવી છે.
ક્રિસ હેમ્સવર્થ અને એલસા પટાકીએ હોલીવુડની લાઈમલાઈટથી દૂર પોતાના 3 બાળકો સાથે અહીં આવીને એક સામાન્ય અને ગ્રાઉન્ડેડ જીવન શૈલી અપનાવી છે. આ પ્રોપર્ટીમાં ફિટનેસ અને આઉટડોર પ્રવૃત્તિઓ પર વિશેષ ધ્યાન આપવામાં આવ્યું છે, જેમાં સોલાર પેનલ્સ, સ્કેટબોર્ડ રેમ્પ અને પ્રખ્યાત કલાકાર ઓટિસ હોપ કેરી દ્વારા બનાવવામાં આવેલ આર્ટવર્ક પણ સામેલ છે. આ સેલિબ્રિટી કપલના અહીં વસવાટ કરવાથી આ વિસ્તાર દુનિયાભરમાં ચર્ચાનું કેન્દ્ર બન્યો છે અને હવે પરિવારના અન્ય સભ્યો પણ આ જ વિસ્તારમાં પ્રોપર્ટી ખરીદી રહ્યા છે.
